Kinundenar ti umili ti Dupax Del Norte, Nueva Vizcaya ti plano a panagminas iti komunidad da. Idi Agosto 4, inikkan ti Mines and Geosciences Bureau ti Woggle Corporation, maysa a kumpanya a nakabase idiay United Kingdom ti exploration permit tapno adalen ti mineral a maala iti ili. Plano ti kumpanya a sakupen ti 3,102 ektarya a daga ti lima a barangay a 10% ti nasao nga ili.

Dagus met a nagiruar ti resolusyon ti barangay Oyao laban iti panagminas ken ti sangguniang bayan a nangimandar iti kanselasyon ti mapaspasamak a mining exploration iti pagilyan. Nangipeksa ti panagkundenar ti Diocese of Bayombong. Nagisayangkat ti signature campaign dagiti residente.

Kabayatanna, immawag ti komunidad ti Barangay Bulalacao, Mankayan, Benguet para iti panangwaswas iti permit ti Crescent Mining Development Corporation (CMDC) para iti Mineral Production Sharing Agreement a balbaliw a naited iti kumpanya iti laksid ti kinaawan ti free, prior and informed consent manipud kadagiti katutubo ken certification of precondition, nga intuding ti reaksyunaryo a linteg.

Adda iti 534 ektarya a paset ti ansestral a daga ti saksakupen ti proyekto ken naited met iti kumpanya ti nayon a 300 ektarya iti kapada a lugar. Ti operasyon ket pangta iti nasurok a 600 pamilya a nakasanggir iti panagmula iti ansestral a daga. Ti CMDC ket sanikua ti Asean Copper, a 40% daytoy ket sanikua ti maysa a kumpanya nga Australian.