Iggem dagiti plakard, bandera ken megaphone, sipipinget nga iyab-abante ti kabataan a Pilipino ti patriyotiko ken demokratiko a dangadang da iti sango ti pinainget nga atake ti rehimen Marcos ken National Task Force-Elcac laban kadakwada. Saanda nga agul-ulimek ken agkedkedked da nga agtakrot ken agrukma iti pasista a diktar ti estado.

Kadagiti napalabas a lawas, nadumaduma nga aktibidad ti inyuna ken dinar-ayan ti kabataan tapno ibunannag ken batikusen dagiti kontra-umili a patakaran ti rehimen Marcos. Iti uneg ken ruwar dagiti pagadalan, makipaspaset da kadagiti dangadang ti umili.

Panagtignay kadagiti unibersidad

Ginasut a kabataan-estudyante ti nakipaset kadagiti demonstrasyon ken aktibidad iti pribado ken pangpubliko nga unibersidad tapno sabaten ti panaglukat ti klase iti napalabas a bulan. Pinalatak da kadagiti tignay ti isyu ti edukasyon, panangitandudo iti demokratiko a karbengan da ken pananglaban iti panangipawil iti akademiko a wayawaya.

Nasurok 1,300 kabataan ti nagprotesta iti Polytechnic University of the Philippines (PUP) idiay Sta. Mesa idi Setyembre 2 tapno rugyan ti baro nga akademiko a tawen. Iti University of the Philippines (UP)-Los Baños, dimmanun iti 500 ti nagtignay nga estudyante idi Agosto 12. Ginasut met ti nakipaset kadagiti rali iti dadduma pay a kampus ti UP manipud Baguio, agturong Diliman, agingga Visayas ken Mindanao.

Naaramid met dagti tignay iti Technological University of the Philippines Manila, Cavite State University, Southern Luzon State University idiay Quezon, iti Bicol University ken Western Visayas State University idiay Iloilo.

Kalpasan ti mano a tawen, balbaliw met a nakapagtitipon ti Samahan ng mga Mag-aaral sa Kalinga, maysa nga organisasyon iti Kalinga State University (KSU) idi Agosto 30 idiay Tabuk City. Ti grupo ket dati a bigbigbigen ti unibersidad ngem naisardeng idi na-red-tag iti duron ti NTF-Elcac ken AFP idi 2021.

Kadagiti pribado a pagadalan, nagikasa ti tignay dagiti kabataan iti Saint Louis University idiay Baguio City, iti Adamson University, Ateneo de Manila University, De La Salle University ken dadduma pay nga unibersidad. Saanda a nagbuteng iti represyon ti administrasyon, pangta ti suspensyon ken dadduma pay a managdusa nga addang.

Ruwar iti kampus

Ti kabataan ket saan nga agpakpakulong kadagiti isyu iti uneg ti kampus. Militante nga agmarmartsa da kadagiti kalsada a kadwa dagiti mangmangged ken nakurapay iti syudad ken agturturong da iti kaaw-awayan tapno makikaykaysa iti masa a mannalon ken nailyan a minorya.

Dagiti kabataan ket makikaykaysa tatta iti panangbatikos ti umili kadagiti naanomalya ken napnuan korapsyon a proyekto a flood control ken dagiti imprastruktura. Dinarup ken binarsa-barsak da ti pitak ken bulok a nateng ti upisina dagiti kontratista ken ti Department of Public Works and Highways ken immawag da ti panagsungbat ti rehimen Marcos.

Nakipaset da iti laban iti demolisyon dagiti residente ti Smokey Mountain ken Malara idiay Tondo. Agtultuloy a sumupsuporta da iti laban dagiti mangmangged ken unyon ti Nexperia, iti welga iti Kawasaki ken nagturong da kadagiti piketlayn.

Rimrimbawan da ti buteng ken teror nga isaksaknap ti militar iti kaaw-awayan iti panagdar-ay da kadagiti fact-finding mission idiay Mindoro ken Quezon. Ar-aramaten da ti social media tapno ibunannag iti publiko ti umad-ado a kaskaso ti panaglabsing iti karbengan-tao iti kaaw-awayan.

Uray dagiti kabataan a Pilipino iti ballasiw-taaw ket agaw-awid iti Pilipinas tapno makipaset iti dangadang ti umili. Iti napalabas a bulbulan, pinullo a kabataan manipud US ti bimmisita iti Pilipinas tapno agadal iti dangadang dagiti sektor.

Saan nga ikaskaso ti kabataan ti gasgasen a “terror grooming” nga iskema ti NTF-Elcac kadagiti aktibidad ti sektor. Natured a pangig-iggeman tatta ti kabataan a Pilipino ti nairut a rebbengen ti panangriing, panangorganisa ken panangpatignay iti masa nga anakling-et. Panpandayen da ti bagabagi da ken bakbaklayen da ti sakripisyo kas sumaruno a tumawid iti dangadang ti umili a Pilipino.