Tulo ka kaso sa pag-aresto, usa sa paturagas nga pagpamomba ug mga kaso sa sarbeylans ug pagpamig-ot ang nataho nga mga paglapas sa tawhanong katungod niining milabayng duha ka semana.

Sa Southern Leyte, giaresto sa mga pwersa sa estado ang 61 anyos nga si Felixberto Consad, myembro sa Piston sa Butuan City, sa iyang balay sa Sogod niadtong Agosto 14. Gikasuhan siya og kasong pagpatay ug gidala sa Sogod Police Station. Nanimuyo si Consod sa Southern Leyte aron likayan ang pagpamig-ot sa militar.

Sa Rizal, duha ka residente sa Sityo Rawang, Barangay Tandang Kutyo, Tanay ang giaresto niadtong Agosto 29. Ang mga biktima giaresto tungod sa ilang pagbarog uban ang komunidad sa pagpangilog og yuta sa pamilyang Chua-Tan ug Sta. Lucia Corporation sa erya.

Sa Camarines Norte, gidakop sa mga sundalo sa 16th IB si Faye Margarette Tallow, usa ka organisador sa mga mag-uuma, sa Barangay Malibago, Labo niadtong Setyembre 4. Gireyd sa militar ang balay nga gisak-an ni Tallow ug didto siya gidagit. Hangtud karon wala pa siya gipakita sa militar.

Sa Cavite, gipasakahan og hinimu-himong kaso sa 2nd CMO Battalion silang Jojo Mercado, Miriam Villanueva ug uban pang residente sa Purok 5, Barangay Langkaan 1, Dasmariñas tungod sa pag-abog nila sa mga sundalo sa komunidad. Lambigit kini sa pagbalibad nila nga papaliton sa ilang tindahan ang mga elemento sa batalyon.

Pagpamomba. Gitugaw sa kusog nga bomba, kanyon, ug istraping sa mga yunit sa AFP ang kahilum ug oras sa pagpahulay sa mga residente sa Tapaz, Capiz niadtong alas-2:30 sa kaadlawon sa Agosto 22. Nagbunga kini og grabeng kaguliyang ug nagtukmod sa pipila ka pamilya nga mobiya sa ilang komunidad.

Pagpaniktik. Giestorya ug gitiktikan sa usa ka pulis ang mga myembro sa Pamalakaya-Navotas niadtong ulahing semana sa Agosto. Nangayo og impormasyon ang ahenteng pulis, nga nagpailang taga-Bureau of Fisheries and Aquatic Resources, ug nagtanyag og kwarta bugti sa impormasyon kalabot sa grupo. Aron ibutyag ang pagpaniktik, gikumpronta sa grupo ang pulis niadtong Agosto 31 sa usa ka restawran.