Determinado ti Partido, New People’s Army ken intero a rebolusyonaryo a tignay idiay Negros a patibkeren ti base a masa iti saklaw daytoy. It-ited da ti sibubukel a pigsa, kinatured ken awan panagdudwa a panagipatungpal iti gawaing masa iti tarabay ti tignay panagilinteg iti sango ti awan sarday nga operasyon militar iti larangan gerilya.

Iti dandani makabulan ti Agosto, pinairteng ken pinalawa ti AFP ken SAF-PNP ti operasyon militar iti kabambantayan ti maysa a larangan iti Negros. Naipakat ditoy ti nasurok 600-700 pwersa iti 32 kolum (9-12 elemento) ti pasista a tropa manipud iti lima a batalyon ti militar ken maysa a batalyon ti pulis. Nakaalerto met dagiti elemento ti CAFGU kadagiti detatsment ken patrol base iti kanito nga adda mapasamak a rinnupak ti militar ken dagiti yunit ti NPA.

Panggep ti napuskol a presensya ti kabusor a pawilan ti base a masa, kubongen ken parmeken dagiti yunit ti hukbo ti umili ken sibubukel a rebolusyonaryo a tignay iti saklaw ti larangan gerilya.

Ar-aramaten ti AFP ken PNP dagiti simmuko a traydor iti masa ken rebolusyon. Agserserbi da a giya tapno sugoden ti lugar, agimula ti buteng ken pwersado nga agpasuko kadagiti sibilyan. Sumursurot da kadagiti soldado iti panag-espiya, panagala ti ladawan iti balbalay ken indibidwal nga at-atapen da a sumupsuporta iti NPA iti linged dagiti peke a sensus. Bayat nga agdakdakiwas dagiti ahente ken soldado kadagiti komunidad, adda dagiti soldado a nakapakat iti nangangato ken estratehiko a tereyn. Agserserbi da a blocking force kadagiti nasulinek a lumsotan ken dalan agturong iti kaabay a baryo.

Panangpatibker iti base a masa

Iti tengnga daytoy, balbaliw a naitakder dagiti naan-anay a timpuyog ti masa (ganap na samahang masa/GSM) idiay Marcia, maysa kadagiti baryo a saksakupen ti kabuklan nga operasyon militar. Mayorya kadagiti residente ditoy ket agtaud iti basaran a dasig. Kaadwan kadakwada ket makitaltalon iti apo’t daga a saan nga agindeg iti barangay.

Narigat ti biag dagiti mannalon iti Marcia. Biktima da ti pyudal ken malapyudal a panaggundaway. Ingkatlo ti bingay da iti produkto da. Kadagiti matangtangdanan, ₱300 ti inaldawan ken ₱500 met iti pakyawan a patrabaho. Nalatlatak ditoy ti pakyaw a pamuspusan iti panagtrabaho ngem ti inaldawan. Tapno manayunan ti sapul da, dagiti mannalon ket agtartaraken ti ayup a panglako.

Asideg iti baryo dagiti detatsment ti CAFGU ken patrol base ti AFP. Kadagiti napalabas a tawen, ti baryo ket nakapadas ti nakaro a militarisasyon nu sadinno a nakaam-ames dagiti abuso a militar ken krimen iti gubat dagiti soldado.

Iti sango daytoy, dagiti residente ti Marcia ket nairut nga agkaykaysa tapno rimbawan dagiti parikut a sangsangwen da iti ekonomya, pulitika, kultura ken militar. Ginasut a pamilya, nga addaan 2,000 nga indibidwal, ti pumapauneg kadagiti balangay ti Pambansang Katipunan ng mga Magbubukid (PKM), Makibaka ken Kabataang Makabayan (KM). Dandani maysa a platun ti milisyang bayan ti napatignay iti depensa, dagiti tim ti yunit pangdepensa iti baryo iti tunggal sityo ken adda ti sangay ti Partido iti lokalidad a mangidadaulo iti baryo.

Panagitakder ti balangay

Naangay itay nabiit ti asembleya tapno balbaliw nga itakder ti balangay ti PKM iti baryo. Ti aktibidad ket naluktan iti oryentasyon iti seguridad. Dinayaw ti kumander ti hukbo ti kinatured ti masa a nangiduron nga ituloy ti pulong masa iti laksid a tallo a kilometro laeng manipud iti pwesto da ti agop-operasyon a militar.

Iti pulong masa, sistematiko a tinalantan da, iti panangidaulo ti instruktor iti pulitika ti hukbo, dagiti nakasagana a dokumento ti panaglagom iti tignay iti lugar, ti pakasaritaan, maudi a resulta ti panagsukisok iti gimong, suhetibo a sitwasyon, istruktura ken akem, 1-tawen a programa ken dagiti patakaran ti rebolusyonaryo nga organisasyon ti masa iti baryo. Nagtalmeg da iti rebolusyonaryo a pakasaritaan ti baryo. Nalatak ti diskusyon iti panagtitinnulong ti intero a tignay manipud pay dekada 1960 iti panawen ti KM, dekada 1970 iti panawen ti linteg militar ni Marcos Sr, ken panagsangpet ti hukbo ti umili iti baryo agingga iti agdama.

Sakbay ti aktibidad, naiyaramid ti serye dagiti pulong-konsultasyon ti Partido, yunit ti NPA ken responsable a lider masa iti baryo. Naaramid ti komprehensibo a plano basar iti kabuklan a plano ti komite iti larangan ken seksyon komite ken iti aktwal a garaw ti kabusor. Iti makalawas, nailista dagiti trabaho ken rekisitos iti panagipatungpal ti plano kas ti panaglagom, panagsukisok ken panagbukel ti plano. Naiyaramid ti umuna a pulong tapno talantanen dagiti borador ken adalen dagiti naisagana a dokumento. Naaramid a kampanya ti panangpagkaykaysa iti sibubukel nga organisado a masa kadagitoy a dokumento kagiddan ti kampanya iti panagadal ti Rebolusyon. Naaramid met a kampanya ti panangrepaso iti rebolusyonaryo a tarabay iti reporma nga agraryo, a maysa kadagiti basaran a dokumento ti CPP.

Maikadwa a paset: Tignay panagilinteg ken ti panangitakder ti timpuyog ti masa.