Tulo nga kaso han pangaresto, usa nga kaso han waray wantas nga panmomba ngan mga kaso han sarbeylans ngan pan-gigipit an nahireport nga mga pagtalapas ha tawhanon nga katungod hadin nakalabay nga duha kasemana.

Ha Southern Leyte, gin-aresto han mga pwersa han estado an 61-anyos nga hi Felixberto Consad, membro han Piston ha Butuan City, ha iya balay ha Sogod hadton Agosto 14. Ginkasuhan hiya han kaso nga pagpatay ngan gindara ha Sogod Police Station. Nag-uukoy hi Consod ha Southern Leyte agud likyan an pan-gigipit han militar.

Ha Rizal, duha nga residente han Sityo Rawang, Barangay Tandang Kutyo, Tanay an gin-aresto hadton Agosto 29. Gin-aresto an mga biktima tungod ha ira pagtindog, kaupod an komunidad, ha panlulupot han tuna han pamilya Chua-Tan ngan Sta. Lucia Corporation ha erya.

Ha Camarines Norte, gindakop han mga sundalo han 16th IB hi Faye Tallow, usa nga organisador han mga parag-uma, ha Barangay Malibago, Labo hadton Septyembre 4. Ginreyd han militar an balay nga gin-uukyan ni Tallow ngan didto hiya ginsikmit. Tubtub yana diri pa hiya ginlulutaw han militar.

Ha Cavite, ginsalawdan han hinimu-himo nga kaso han 2nd CMO Battalion hira Jojo Mercado, Miriam Villanueva ngan iba pa nga residente han Purok 5, Barangay Langkaan 1, Dasmariñas tungod ha pagtabrog nira ha mga sundalo ha komunidad. Kasumpay ini han pagdiri nira nga magbaligya an ira tindahan ha mga elemento han batalyon.

Panmomba. Ginsamok han magbakod nga bomba, kanyon, ngan pangistraping han mga yunit han AFP an kamingawan ngan oras han pamahuway han mga residente han Tapaz, Capiz hadton alas-2:30 han kaagahon han Agosto 22. Nagdurot ini hin grabe nga kasamok ngan nagduso ha pira nga pamilya nga mag-ebakwet tikang ha ira komunidad.

Paniniktik. Ginkaestorya ngan gintiktikan han usa nga pulis an mga membro han Pamalakaya-Navotas hadton urhi nga semana han Agosto. Nag-aro hin impormasyon an ahente nga pulis, nga nagpakilala nga taga-Bureau of Fisheries and Aquatic Resources, ngan nagtanyag hin kwarta kabalyo han impormasyon hiunong ha grupo. Agud ibuksas an paniniktik, ginkompronta han grupo an pulis hadton Agosto 31 ha usa nga restawran.