Kadagitoy napalabas a bulbulan, agsasaruno dagiti war games nga insayangkat ti Australia iti Pilipinas. Dagitoy ket maitunos iti estratehiko a plano ti panangsalaknib ti hegemonya ti US iti Asia-Pacific, nu sadinno a dakkel ti bentahe ti Australia.

Kabilang kadagitoy a war games ti Alon 2025, a naiyaramid iti daga ken kabaybayan ti Palawan, Mindoro ken dadduma pay a paset ti Luzon. Iti daytoy a war games, nagipatulod ti Australia ti kadakkelan a bilang dagiti soldado iti Southeast Asia manipud idi nakibiang daytoy idiay East Timor idi 1999. Sakbay daytoy, insayangkat ti Australia ti Kasangga 2025, maysa a pagsasanay iti kontra-insurhensya iti Camp Kibaritan idiay Bukidnon.

Itay nabiit, induron metten ti Australia ti panagitakder ti bukod daytoy a base iti Pilipinas a pagbalayan ti dumakdakkel a bilang ti tropa ken ramramit da iti pagilyan. Idi Agosto 22, pinirmaan dagiti upisyal iti depensa ti Australia ken Pilipinas ti Statement of Intent for Enhanced Defense Cooperation tapno wayaan daytoy a panggep. Naituding a mapinal ti katulagan inton 2026.

Wayaan daytoy a katulagan ti permanente a panagpwesto dagiti tropa ti Australia iti Pilipinas, ti panagisayangkat ti dadakkel a war games ken panagpuonan iti “imprastruktura a pangdepensa” wenno dagiti base militar. Daytoy a katulagan ket agbalin a kapada ti Enhanced Defense Cooperation Agreement (EDCA) iti baet ti Pilipinas ken US, a mangrabrabngis iti soberanya ti pagilyan ken mangigalut iti pagilyan kadagiti armado a risiris a parparubroben ti US.

Dagiti tropa, lugan ken ramit a panggubat ti Australia ket nayon iti nakadakdakkelen a makinarya a militar ti US a nakapakaten iti Pilipinas.

Kabayatanna, maysa manen a base a nabal ti linuktan ti AFP, iti direksyon ti US, idiay Mahatao, Batanes daytoy Setyembre. Ti base ket paset ti iket dagiti forward operating base nga iya-aplag ti US kadagiti isla ti Batanes (may isa pa sa isla ng Mavulis) gapu iti kinaasideg daytoy iti Taiwan.

Iti kanaig a damag, naibunannag ti pananglukat ti rehimen Marcos iti Camp Cape Bojeador idiay Burgos, Ilocos Norte tapno agbalin a bodega ti bala ti US. Dagitoy a maudi nga addang ket ad-adda a mangguyguyod iti Pilipinas iti mapapainget a risiris ti US iti China.