Tatlo ka kaso sang pagpang-aresto, isa ka kaso sang patarasak nga pagpangbomba kag mga kaso sang sarbeylans kag pagpang-ipit ang nalista nga mga paglapas sa tawhanon nga kinamatarung sining nagligad nga duha ka semana.

Sa Southern Leyte, gin-aresto sang mga pwersa sang estado ang 61-tuig nga si Felixberto Consad, myembro sang Piston sa Butuan City, sa iya balay sa Sogod sadtong Agosto 14. Ginkasuhan siya sang kaso nga pagpatay kag gindala sa Sogod Police Station. Nagapuyo si Consad sa Southern Leyte agud likawan ang pagpang-ipit sang militar.

Sa Rizal, duha ka residente sang Sityo Rawang, Barangay Tandang Kutyo Tanay ang gin-aresto sadtong Agosto 29. Ang mga biktima gin-aresto tungod sa ila pagtindog, kaupod ang komunidad, sa pagpang-agaw sang duta sang pamilya Chua-Tan kag Sta. Lucia Corporation sa erya.

Sa Camarines Norte, gindakop sang mga soldado sang 16th IB si Faye Margarette Tallow, isa ka organisador sang mga mangunguma, sa Barangay Malibago, Labo sadtong Septyembre 4. Gin-reyd sang militar ang balay nga ginateneran ni Tallow kag diri siya gindakop. Tubtob subong wala pa siya ginpatuhaw sang militar.

Sa Cavite, ginpasakaan sang himo-himo nga kaso sang 2nd CMO Battalion sanday Jojo Mercado, Miriam Villanueva kag iban pa nga residente sang Purok 5, Barangay Langkaan 1, Dasmariñas tungod sa pagtabog nila sa mga soldado sa komunidad. Kaangot ini sa pagpamalibad nila nga baligyaan sang ila tindahan ang mga elemento sang batalyon.

Pagpangbomba. Gingamo sang mga mabaskog nga bomba, kanyon, kag pagpang-istraping sang mga yunit sang AFP ang kalinong kag oras sang pagpahuway sang mga residente sang Tapaz, Capiz sadtong alas-2:30 sang kaagahon sang Agosto 22. Nagtuga ini sang grabe nga kahangawa kag nagtulod sa pila ka pamilya nga maghalin sa ila komunidad.

Pagpanilag. Gin-estorya kag ginpanilagan sang isa ka pulis ang mga katapo sang Pamalakaya-Navotas sadtong ulihi nga semana sang Agosto. Nagpangayo sang impormasyon ang ahente nga pulis, nga nagpakilala nga taga-Bureau of Fisheries and Aquatic Resources, kag nagtanyag sang kwarta kabaylo sang impormasyon angot sa grupo. Agud ibuyagyag ang pagpanilag, ginkomprontar sang grupo ang pulis sadtong Agosto 31 sa isa ka restawran.