Panagikkat iti Wyeth, nasupyat. Binatikos ti Wyeth Philippines Progressive Workers Union (WPPWU- DFA-KMU) ti iskema a “cluster crew” a plano nga ipatungpal ti kumpanya iti pabrika. Segun iti unyon, pamuspusan daytoy ti pleksibilisasyon a mangnayon ti trabaho ti mangmangged, panagakar iti sabali a seksyon iti produksyon ken posible nga agtungpal iti panagikkat kadagiti mangmangged.

Rimwar ti plano a panagipatungpal ti “cluster crew” iti panawen nga agiyar-aramid ti negosasyon dagiti mangibagi ti WPPWU ken idaulwan ti Wyeth para iti baro a CBA a narugyan idi Hunyo. Isaksakad ti unyon iti negosasyon ti ₱15,000 nayon a sweldo iti unos ti tallo a tawen, nayon a benepisyo ken regularisasyon kadagiti kontraktwal.

Maika-100 aldaw ti welga iti Kawasaki, nalagip. Nagtitipon dagiti mangmangged ti Kawasaki United Labor Union (KULU) idi Agosto 29 tapno lagipen ti maika-100 aldaw ti welga nga inkasa da gapu iti deadlock iti negosasyon iti CBA. Nagprograma da iti sango ti hedkwarters ti Kawasaki Motors Phils Corporation (KMPC) idiay Muntinlupa City. Nakikaykaysa iti programa ti Kilusang Mayo Uno ken dagiti unyon daytoy.

Mangmangged nga inikkat ti Nexperia, naisubli. Kalpasan ti mano a bulan a panangirupir ken panangipila ti kaso iti Dole, naipangabak ti Nexperia Philippines Inc. Workers Union (NPIWU-NAFLU-KMU) idi Agosto 18 ti panangpasubli iti trabaho ti dua a mangmangged ken lider ti unyon nga iligal nga inikkat ti kapitalista. Segun iti desisyon, kasapulan a maisubli ti dua iti dati a pusisyon da, pagtalinaeden ti seniority rights da, ken bayadan ti amin a saan da a naawat a sweldo ken benepisyo manipud Marso agingga iti panagsubli da iti trabaho. Naikkat ti dua ken ti dua pay nga upisyal ti unyon idi Disyembre 2024 iti pammabasol ti “panangtubeng” iti panagruar-serrek dagiti produkto iti kumpanya.