Inambus ti maysa a yunit ti New People’s Army (NPA)-Albay (Santos Binamera Command) ti agop-operasyon a 16-katao nga iskwad ti 49th IB idi Agosto 21 idiay Barangay Palapas, Ligao City, Albay. Saan a bumaba iti tallo a pasista a soldado ti napatay ken maysa pay ti naiyulat a nasugatan iti ambus.

Segun iti ulat ti NPA-Albay, gangandaten dagiti tropa ti 49th IB nga umasideg iti kampo ti hukbo ti umili tapno ireyd ti yunit. Kuna daytoy, nabantayan ti masa ti garaw dagiti pasista a tropa isu a dagus a nakaaramid ti mapangngeddeng nga addang ti yunit ti hukbo tapno patamaan daytoy.

Idiay Negros Occidental, inambus ti NPA-South Central Negros (Romeo Nanta Command) ti tropa ti 94th IB ken CAFGU nga agop-operasyon idiay Sityo Balao, Barangay Tan-awan, Kabankalan City idi Setyembre 4. Tallo ti nadunor kadagiti pasista a soldado.

Aktibo a depensa. Idiay Aurora, maysa a soldado ti 91st IB ti nasugatan iti aktibo a panagdepensa ti maysa a yunit ti NPA-Aurora (Domingo Erlano Command) idi Agosto 21 ti malem idiay Sityo Aguses, Barangay Matawe, Dingalan. Tallo a bulanen ti focused and sustained military operations ti 91st IB idiay Dingalan ken kadagiti kaabay nga ili daytoy.

Kadagiti napalabas a lawas, agsasaruno dagiti naiyulat nga armado nga aksyon ken aktibo a depensa dagiti yunit ti NPA laban iti umat-atake a tropa ti Armed Forces of the Philippines. Malaksid idiay Albay ken Aurora, naimaldit dagitoy idiay Masbate, Oriental Mindoro, Quezon ken Capiz.

Panpaneknekan dagitoy a serye ti labanan nga inuulbod ti pablaak ni Ferdinand Marcos Jr idi Hulyo nga “awanen ti grupo a gerilya” iti pagilyan.