Agsasaruno a protesta ti insayangkat dagiti progresibo a grupo laban iti rehimen Marcos ken dagiti kontratista a sangkot iti korapsyon ken anomalya kadagiti proyekto a flood control ken dadduma pay nga imprastruktura. Naaramid dagiti tignay idi Setyembre 4 ken Setyembre 5 iti panangiyuna ti Bayan. Adda met ti taray laban iti korapsyon idiay University of the Philippines-Diliman idi Setyembre 7 a dinar-ayan ti nasurok 1,000 katao.

Dinarup ken pinampag met dagiti grupo a pangkalikasan ken biktima dagiti kalamidad idi Setyembre 4 ti upisina idiay Pasig City ti St. Gerard Construction, a sanikwa dagiti Discaya, a maysa kadagiti kontratista nga imbwelto iti korapsyon nangruna kadagiti bulok a proyekto a flood control. Binarsak da ti pitak ti logo ken tarangkaan ti kumpanya kas panangipakita ti pungtot da.

Iti kapada nga aldaw, dinarup dagiti kameng ti Anakbayan ti nailyan nga upisina ti DPWH idiay Manila. Kagiddan daytoy ti protesta ti grupo a KYUSI 4 Truth and Accountability idiay Quezon City ken ti Bayan-National Capital Region ken ONE Taft idiay Pedro Gil. Idiay Marikina City, nagprotesta dagiti babbai iti panangiyuna ti Gabriela Women’s Party.

Idi Setyembre 5, nagkakadwa dagiti grupo iti panangpampag iti House of Representatives idiay Quezon City tapno kundenaren ti DPWH ken ni Marcos. Inrana da ti tignay iti panagdengngeg para iti badyet ti departamento. Maysa a protesta met ti inyuna ti Bayan-Central Visayas iti DPWH Region 7 idiay Cebu City. Idiay Pampanga ken Bulacan, nagprotesta ti Bayan-Central Luzon iti napalabas a lawas.