Balbaliw a bimtak idi Agosto ti protesta ti umili nga Indonesian laban kadagiti kontra-umili a patakaran ti presidente ti pagilyan a ni Prabowo Subianto ken bise presidente na a ni Gibran Rakabuming Raka. Kimmaro ti pungtot da kalpasan a talanan ti lugan ti pulis ken napatay ni Affan Kurniawan, maysa a delivery rider, idi Agosto 28. Manipud iti kabisera idiay Jakarta, simmaknap dagiti protesta iti 32 prubinsya ken dagiti syudad ti Bandung, Surabaya, Malang, Solo, Yogyakarta, Medan ken Makassar.

Kadagiti naudi a protesta, impamatmat ti umili ti kinakaro ti pungtot da iti panangpuor kadagiti pangpubliko a pasdek, pasilidad ken luglugan ken panangserrek da kadagiti balay ti kurakot nga upisyal ken pulitiko. Pinawilan ti rehimen Prabowo-Gibran dagiti protesta babaen ti tear gas, water cannon ken rubber bullet. Impauneg ti rehimen iti arig na linteg militar dagiti kalsada ken komunidad ken minandaran na ti pulis a mang-aresto ken pumaltog kadagiti raliyista.

Dumanon iti 10 ti pinatay dagiti pwersa ti estado manipud Agosto 25 agingga Setyembre 2, bayat a 1,241 ti naaresto (kabilang dagiti naideklara a mapukpukaw) ken 800 ti nakaro a nasugatan.

Ti nanggangat kadagiti protesta ket ti rurod ti umili iti panangted ti rehimen ti binulan nga alawans para iti pabalay dagiti kameng ti parlamento, a 20 daras a nangatngato ngem ti minimum a sweldo dagiti mangmangged. Sabali pay ti sweldo da a 100 milyon rupiah wenno ₱350,000 kada bulan. Kagiddan daytoy, kinissayan ni Prabowo ti badyet para kadagiti rehiyon, a nangiduron kadagiti lokal a gubyerno nga agipataw ti nayon a buwis nga agingga 250%.

Ti rehimen ket bin-ig a kagurgura dagiti Indonesian, iti laksid ti “popularidad” na kano idi mabotosan. Iti umuna a tawen na iti poder, nakumikom ni Prabowo iti panangbussog iti gabinete ken upisyal iti parlamento na. Pinalawa na ti bileg ti militar ken pulis tapno konsolidaen ti kontrol na iti estado. Kinonsolida na ti kurakot ken benepisyo babaen ti panangitakder ti BPI Danantara (National Sovereign Wealth Fund).

Nabayagen nga agburburek ti pungtot dagiti Indonesian iti kinainutil ti estado a sungbatan ti krisis iti pagbiagan ken ekonomya. Agkakangato ti presyo dagiti gagatangen ken serbisyo, gastos iti edukasyon ken salun-at. Adu ti awanan trabaho ken nasaknap ti kinaawan kasiguraduan iti trabaho. Ti minimum a sweldo ket adayo a saan a makaanay iti kasapulan ti maysa a pamilya.

Malaksid iti nailyan a kabisera, nainget ti panaggundaway iti trabaho, panag-agaw ti daga dagiti gangannaet a korporasyon, nasaknap a panagpadisi kadagiti mannalon ken katutubo, panagdadael iti kalikasan ken kriminalisasyon iti panagsupyat kadagiti engrande a proyekto nga imprastruktura, minas ken plantasyon a rinugyan ti immuna a rehimen Widodo ken itultuloy ni Parabowo.

Pati idiay Central Java, nagprotesta idi umuna a lawas ti Agosto ti 100,000 katao tapno laksiden daytoy a nayon a buwis ken irupir ti panangpadisi iti rehente (mayor) iti poder ken panagibasura iti dadduma pay a kontra-umili a patakaran na. Idi Hulyo, nagprotesta met ti babassit a negosyante, dagiti mangmangged ken nakurapay a napatalaw tapno wayaan ti 1,175-ektarya a Mandalika Special Economic Zone, maysa a proyekto a megaturismo. Didiay met laeng a bulan, nagwelga dagiti mangmangged ti PT Huadi Nickel Alloy Indonesia laban iti nasaknap a panagikkat ken pwersado a panagpalangan iti trabaho nga awan ti negosasyon.

Dagiti protesta iti Indonesia ket nagani ti suporta manipud kadagiti umili kadagiti kabangibang a pagilyan iti Asia a makarikrikna ti kapada a krisis iti pagbiagan ken sumangsango iti kapada a represyon ken pasismo.

Nagidanun met ti pannakikaykaysa ti Communist Party of the Philippines (CPP) kadagiti protesta a kunana a mangpalpalatak iti nainget a tarigagay ti umili nga Indonesian para iti rebolusyonaryo a panagbalbaliw. Kas ti masa nga analing-et nga Indonesian, bakbaklayen ti Pilipino nga anakling-et ti dagsen ti saan a patas a sistema iti ekonomya, a pakpakarwen ti sangalubongan a krisis ti kapitalismo, bayat nga agtultuloy nga agpappapas dagiti reaksyunaryo a dasig ken pulitiko.

Nadam-eg ti kundisyon idiay Indonesia para iti nairteng a naindasigan a dangadang, saan laeng a babaen kadagiti protesta ti masa, nu di ket napatpateg, babaen ti armado a panaglaban ken gubat ti umili, segun iti CPP.