Hini nga naglabay nga mga bulan, susrunod an mga war games nga iginlalansar han Australia ha Pilipinas. Nasubay ini ha estratehiko nga plano han pagdepensa han hegemoniya han US ha Asia-Pacific, kun diin dako an bentaha han Australia.

Usa ha mga war games an Alon 2025, nga ginhimo ha tuna ngan kadagatan han Palawan, Mindoro ngan iba pa nga parte han Luzon. Hini nga mga war games, nagpadara an Australia han pinakadako nga ihap han mga sundalo ha Southeat Asia tikang han manginlabot ini ha East Timor hadton 1999. Antes hini, iginlansar han Australia an Kasangga 2025, usa nga pagpapahiara ha kontra-insurhensiya ha Camp Kibaritan ha Bukidon.

Diri pala maiha, iginduso na liwat han Australia an pagtitindog han kalugaringon hini nga mga base ha Pilipinas agud igbalay an natikadako nga ihap han tropa ngan ira mga higamit ha nasud. Hadton Agosto 22, ginpirmahan han mga upisyal ha depensa han Austraila ngan Pilipinas an Statement of Intent for Enhanced Defense Cooperation agud ihagudalan an katuyuanan hini. Nakatalaan nga igpinal an kasarabutan ha 2026.

Ginhahagudalan hini nga kasarabutan an pirmihan nga pagpwesto han mga tropa han Australia ha Pilipinas, paglalansar han dagko nga war games ngan pamumuhunan ha “imprastraktura nga pandepensa” o mga base militar. Ini nga kasarabutan magigin kapareho ha Enhanced Defense Cooperation Agreement (EDCA) giutan han Pilipinas ngan US, nga nagtatamak ha soberaniya han nasud ngan maghihigot ha nasud ha armado nga banggaay nga ginpapaypayan han US.

Dugang an mga tropa, sarakyan ngan higamit pangerra han Australia ha higante na nga panmilitar nga makinarya han US nga nakalatag ha Pilipinas.

Samtang, usa na liwat nga base nabal an gin-abrihan han AFP, ha direksyon han US, ha Mahatao, Batanes hadin Septyembre. Kaparte an base han pukot han mga forward operation base nga iginlalatag han US ha mga isla han Batanes (may usa pa ha isla han) Mavulis tungod ha kahiranihon hini ha Taiwan.

Ha kasumpay nga balita, nabuksas an pag-aabre han rehimen Marcos ha Camp Cape Bojeador ha Burgos, Ilocos Norte agud magin imbakan han bala han US. Ini nga urhi nga mga pitad dugang nga nagdadanas ha Pilipinas ha ginpapapintas nga banggaay han US kontra ha China.