Katin an mga plakard, bandera, ngan megaphone, pursigido nga iginpapasulong han kabatan-unan nga Pilipino an ira patriyotiko ngan demokratiko nga pakigbisog atubangan han ginpagrabe nga atake han rehimen Marcos ngan National Task Force-Elcac kontra ha ira. Diri hira nagpapamingaw, ngan nadiri nga magin mahuyo ngan yumukbo ha pasista nga dikta han estado.

Ha naglabay nga mga semana, magkalain-lain nga aktibidad an ginpangunahan ngan ginpartisiparan han kabatan-unan para ibuksas ngan suknaon an kontra-katawhan nga mga palisiya han rehimen Marcos. Ha sakob ngan gawas han mga eskoylahan, nagpapartisipar hira ha mga pakigbisog han katawhan.

Paggios ha mga unibersidad

Gatus-gatos nga kabatan-unan-estudyante an nagpartisipar ha mga demonstrasyon ngan aktibidad ha pribado ngan pampubliko nga unibersidad agud tapuon an pag-abre han klase ha naglabay nga bulan. Iginpalandaw nira ha mga paggios an isyu han edukasyon, pag-uundong han ira demokratiko nga katungod, ngan pag-ato ha pagpuypoy ha akademiko nga kalibrihan.

Masobra 1,300 kabatan-unan an nagprotesta ha Polytechnic University of the Philippines (PUP) ha Sta. Mesa hadton Septyembre 2 agud tikangan an bag-o nga akademiko nga tuig. Ha University of the Philippines (UP)-Los Baños, inabot ha 500 an gumios nga mga estudyante hadton Agosto 12. Gatus-gatos liwat an nagpartisipar ha mga rali ha iba pa nga kampus han UP tikang Baguio ngadto Diliman, tubtub Visayas ngan Mindanao.

Iginlansar liwat an mga paggios ha Technologial University of the Philippines-Manila, Cavite State University, Southern Luzon State University ha Quezon, ha Bicol University, ngan Western Visayas State University ha Iloilo.

Kataliwan an pira nga tuig, utro liwat nga nakagtirok hadton Agosto 30 ha Tabuk City an Samahan ng mga Mag-aaral sa Kalinga, usa nga organisasyon ha Kalinga State University (KSU). An grupo hadto ginkilala han unibersidad kundi nahunong han igred-tag, ha sulsol han NTF-Elcac ngan AFP hadton 2021.

Ha mga pribado nga eskoylahan, naglansar han paggios an mga kabatan-unan ha Saint Louis University ha Baguio City, ha Adamson University, Ateneo de Manila University, ngan De La Salle University ngan iba pa nga unibersidad. Waray hira magpabantad ha pandarahug han administrasyon, hulga han suspensyon ngan iba pa nga pitad panpenalidad.

Gawas ha kampus

Diri nagpapalimitar an kabatan-unan ha mga isyu ha sakob han kampus. Militante hira nga nagmamartsa ha mga kalsada kaupod an mga trabahador ngan kablas ha syudad, ngan napakadto han kabaryuhan agud makig-usa ha masa nga parag-uma ngan nasyunal nga minoriya.

Kausa yana an mga kabatan-unan ha pagsukna han katawhan ha maanomaliya ngan putos hin korapsyon nga mga proyekyo nga flood control ngan mga imprastraktura. Ginkadto nira ngan ginbalong han lagay ngan dunot nga utanon an upisina han mga kontratista ngan han Department of Public Works and Highways ngan nananawagan han baratunon ha rehimen Marcos.

Nakighan-ay hira ha pakigbisog kontra ha demolisyon han mga residente han Smokey Mountain ngan Malara ha Tondo. Padayon hira nga nasuporta ha pakigbisog han mga trabahador ngan unyon han Nexperia, welga ha Kawasaki, ngan kumadto ha mga piketlayn.

Gin-uungbawan nira an kahadlok ngan ngirhat nga iginsasabrag han militar ha kabaryuhan ha pagpartisipar ha mga fact-finding mission ha Mindoro ngan Quezon. Gin-gagamit nira an social media agud ibuksas ha publiko an tikadamo nga mga kaso han pagtalapas ha tawhanon nga katungod ha kabaryuhan.

Bisan an mga kabatan-unan nga Pilipino ha langyaw nga labnasan nauli ha Pilipinas agud magpartisipar ha pakigbisog han katawhan. Ha naglabay nga mga bulan, grupo-grupo nga kabatan-unan tikang ha US an binisita ha Pilipinas agud mahibaro ha pakigbisog han mga sektor.

Diri ginpipinsar han kabatan-unan an gasgas na nga larang han NTF-Elcac nga pagbabansag ha mga aktibidad han sektor komo “terror grooming.” Maisugon nga ginkakatinan yana han kabatan-unan nga Pilipino an mahugot nga buruhaton han pagpupukaw, pag-oorganisa ngan pagpapagios ha masa nga anakbalhas. Ginpapanday nira an kalugaringon ngan ginsusugbong an sakripisyo komo mga sumurunod han pakigbisog han katawhan Pilipino.