Utro nga binuto hadton Agosto an protesta han katawhan Indonesian kontra ha mga kontra-katawhan nga palisiya han presidente ha nasud nga hi Prabowo Subianto ngan bise presidente niya nga hi Gibran Rakabuming Raka. Naggrabe an ira kangalas kahuman ligison han sarakyan han pulis ngan napatay hi Affan Kurniawan, usa nga delivery rider, hadton Agosto 28. Tikang ha syudad han Jakarta, sinamwak an mga protesta ha 32 nga prubinsya ngan ha mga syudad han Bandung, Surabaya, Malang, Solo, Yogyakarta, Medan, ngan Makassar.

Ha urhi nga mga protesta, iginpakita han katawhan an kagrabihon han ira kangalas ha pagsusunog han mga pampubliko nga mga bilding, pasilidad ngan sarakyan, ngan pagsulod ha mga balay han mga korap nga upisyal ngan pulitiko. Ginpuypoy han rehimen Prabowo-Gibran an mga protesta gamit an tear gas, water cannon ngan rubber bullet. Iginpailarum han rehimen ha baga-balaud militar an mga kalsada ngan komunidad ngan ginmanduan an pulis nga mangaresto ngan manmusil han mga raliyista.

Inabot ha 10 an ginpatay han mga pwersa han estado tikang Agosto 25 tubtub Septyembre 2, samtang 1,241 an gin-aresto (kaupod an mga igindeklara nga nawawara) ngan 800 an grabe nga nasamaran.

Mitsa han protesta an kangalas ha paghahatag han rehimen han binulan nga alawans para ha pabalay han mga membro han parlamento, nga 20 kabeses nga mas madako tanding ha minimum nga suhol han mga trabahador. Gawas pa ini ha ira sweldo nga aada ha 100 milyon rupiah o ₱350,000/bulan. Kadungan hini, gin-ibanan ni Prabowo an badyet para ha mga rehiyon, nga nagduso ha mga lokal nga gubyerno nga mag-imponer han dugang nga buhis nga tubtub 250%.

Duro nga ginkakangalsan han mga Indonesian an rehimen, ha luyo han kunuhay “popularidad” hini han maeleher ha posisyon. Ha syahan nga tuig ha poder, ginkalibangan ni Prabowo an pagpabuy-ay han iya gabinete ngan mga upisyal ha parlamento. Ginpahiluag niya an poder han militar ngan pulis agud konsolidahon an iya kontrol ha estado. Ginkalibangan niya an pagkonsolida han kawat ngan benepisyo pinaagi han pagtukod han BPI Danantara (National Sovereign Wealth Fund).

Maiha na nga nakaladkad an kangalas han mga Indonesian ha kawaray-pulos han estado nga batunon an krisis ha pakabuhian ngan ekonomiya. Naghihitaas an presyo han mga papliton ngan serbisyo, gastos ha edu-kasyon ngan kalibsugan. Daramo an waray trabaho ngan hiluagan an kawaray kaseguruhan ha trabaho. Hirayo nga diri nakasasadang ha panginahanglan han usa nga pamilya an minimum nga suhol.

Gawas ha nasyunal nga kapitolyo, mapintas an paniniyupi ha pagtrabaho, panlulupot han tuna han mga langyaw nga korporasyon, hiluagan nga pagpapalayas ha mga parag-uma ngan minoriya, pagkahibang han kalibungan ngan kriminalisasyon ha pagtipa ha garboso nga mga proyekto nga pan-imprastraktura, mina ngan plantasyon nga gintikangan han nahiuna nga rehimen Widodo ngan iginpapadayon ni Prabowo.

Ha bungto han Pati ha Central Java, nagprotesta hadton syahan nga semana han Agosto an 100,000 katawo agud isalikway ini nga dugang nga buhis ngan igin-insister an pagpapatalsik han rehente (meyor) ha poder ngan pagpapabasura ha iba pa niya nga kontra-katawhan nga palisiya. Hadton Hulyo, nagprotesta liwat an gudti nga negosyante, mga trabahador ngan kablas nga ginpalayas agud ihagudalan an 1,175 kaektarya nga Mandalika Special Economic Zone, usa nga megaturismo nga proyekto. Hito liwat nga bulan, nagwelga an mga trabahador ha PT Huadi Nickel Alloy Indonesia kontra ha hiluagan nga tanggalay ngan pwersahay nga pagpa-absent ha trabaho hin waray negosasyon.

Nakakuha han suporta an mga protesta ha Indonesia tikang ha katawhan ha mga kaamyaw nga nasud hini ha Asia nga nag-aantos han kapareho nga krisis ha pakabuhian ngan naatubang ha kapareho nga pandarahug ngan pasismo.

Nagpadangat liwat hin pakig-usa an Partido Komunista ng Pilipinas ha mga protesta nga sering hini nagpapalandaw ha grabe nga karuyagon han katawhan Indonesian para ha rebolusyunaryo nga pagbabag-o. Kaupod an masa nga anakbalhas nga Indonesian, ginsusugbong han mga Pilipino nga anakbalhas an bug-at han diri pantay nga sistema ha ekonomiya, nga ginpagrabe han pankalibutan nga krisis han kapitalismo, samtang padayon nga napatakas an mga reaksyunaryo nga klase ngan pulitiko.

Matambok an kundisyon ha Indonesia para ha mapintas nga makaklase nga pakigbisog, diri la pinaagi han mga panmasa nga protesta, kundi labaw nga importante, pinaagi han armado nga pag-ato ngan gerra han katawhan, sigon ha PKP.