Susrunod nga protesta an iginlansar han mga progresibo nga grupo kontra ha rehimen Marcos ngan mga kontratista nga dabi ha korapsyon ngan anomaliya ha mga proyekto nga flood control ngan iba pa nga imprastruktura. Iginhimo an mga paggios hadton Septyembre 4 ngan Septyembre 5 ha pangunguna han Bayan. Nagkamayda naman hin dalagan kontra ha korapsyon ha University of the Philippines-Diliman hadton Septyembre 7 nga ginpartisiparan han masobra 1,000 katawo.

Ginkadto ngan ginprotestahan han mga grupo nga pankalibungan ngan biktima han mga kalamidad hadton Septyembre 4 an upisina ha Pasig City han St. Gerrard Construction, pananag-iya han mga Discaya, nga usa ha mga kontratista nga dabi ha korapsyon labina ha dunot nga mga proyekto nga flood control. Ginlabugan nira hin lagay an logo ngan geyt han kompaniya komo pagpapakita han ira kangalas.

Ha pareho nga adlaw, ginkadto han mga membro han Anakbayan an nasyunal nga upisina han DPWH ha Manila. Kadungan hini an protesta han grupo nga KYUSI 4 Truth and Accountability ha Quezon City ngan han Bayan-National Capital Region ngan ONE Taft ha Pedro Gil. Ha Marikina City, nagprotesta an mga kababayin-an ha pangunguna han Gabriela Women’s Party.

Hadton Septyembre 5, nagtirig-ob an mga grupo ha pagprotesta ha House of Representatives ha Quezon City agud kundenahon an DPWH ngan hi Marcos. Igintuman nira an paggios ha pagbista para ha badyet han departamento. Usa nga protesta liwat an ginpangunahan han Bayan-Central Visayas ha DPWH Region 7 ha Cebu City. Ha Pampanga ngan Bulacan, nagprotesta an Bayan-Central Luzon ha naglabay nga semana.