Determinado an Partido, Bagong Hukbong Bayan ngan bug-os nga rebolusyunaryo nga kagiusan ha Negros nga padig-unon an base panmasa ha lupgop hini. Iginhahatag nira an bug-os nga kusog, kaisog ngan kawaray pagruhaduha ha pagpapatuman han buruhaton masa ha giya han kagiusan nga pagtutul-id atubangan han waray hunong nga operasyon militar ha prente gerilya.

Ha haros bug-os nga bulan han Agosto, ginpapintas ngan ginpahiluag han AFP ngan SAF-PNP an ope-rasyon militar ha kabukiran han usa nga prente ha Negros. Igindeploy dinhi an masobra 600-700 nga pwersa ha 32 kakolum (9-12 nga elemento) han pasista nga tropa tikang ha lima nga batalyon han militar ngan usa nga batalyon han pulis.

Nakabantay naman an mga elemento han CAFGU ha mga detatsment ngan patrol base ingkaso may mahitabo nga agway giutan han militar ngan mga yunit han BHB.

Katuyuanan han madakmol nga presensya han kaaway an lanaton an base panmasa, palibutan ngan rumkon an mga yunit han hukbo han katawahan ngan bug-os nga rebolusyunaryo nga kagiusan ha lupgop han prente gerilya.

Gamit han AFP ngan PNP an mga nagsurender nga traydor ha masa ngan rebolusyon. Nagserbe hira nga mga giya agud magsulaysukay ha lugar, magsabrag hin ngirhat ngan piniritay nga magpasurender ha mga sibilyan. Naupod hira ha mga sundalo ha paniniktik, pagkuha han ritrato ha mga balay ngan indibidwal nga gintatahapan nira nga mga tagasuporta han BHB ha tahub han mga kunuhay sensus. Samtang nagsusulaysukay an mga ahente ngan sundalo ha mga komunidad, mayda mga sundalo nga nakapusisyon ha higtaas ngan estratehiko nga tereyn. Nagseserbe hira nga blocking force ha mga ganghaan ha butnga ngan dalan tipakadto ha kasapit nga baryo.

Pagpapadig-on ha base panmasa

Ha butnga hini, utro nga igintukod an mga hul-os nga asosasyon masa ha Marcia, usa ha mga baryo nga lupgop han pankabug-usan nga operasyon militar. Mayoriya ha mga residente dinhi tikang ha batakan nga klase. Kadak-an ha ira saop han agaron maytuna nga diri naukoy ha barangay.

Makuri an kinabuhi han mga parag-uma ha Marcia. Biktima hira han pyudal ngan bagapyudal nga paniniyupi. Tinulo an bahinay ha ira produkto. Ha mga sinuhulan, ₱300 an inadlaw ngan ₱500 naman ha pakyaw nga sistema han trabaho. Mas landaw dinhi an pakyaw nga pamamaagi ha pagtrabaho tanding ha inadlaw. Agud madugngan an kita, nag-aataman han mga hayop nga pambaligya an mga parag-uma.

Hirani ha baryo an mga detatsment han CAFGU ngan patrol base han AFP. Ha nakalabay nga mga tuig, nahiagum hin grabe nga militarisasyon an baryo diin makarimadima an mga panmilitar nga abuso ngan krimen ha gerra han mga sundalo.

Atubangan hini, mahugot nga nagkakaurusa an mga residente han Marcia agud ungbawan an ginkakaatubang nira nga mga problema ha ekonomiya, pulitika, kultura ngan militar. Gatus-gatos nga pamilya, nga may masobra 2,000 nga indibidwal, an nahisasakob ha mga tsapter han Pambansang Katipunan ng mga Magbubukid (PKM), Makibaka ngan Kabataang Makabayan (KM). Haros usa kaplatun han milisya han katawhan an napagios ha depensa, mga tim han yunit nga pandepensa ha baryo ha kada sityo ngan may sanga han Partido ha lokalidad nga namumuno ha baryo.

Pagtutukod han tsapter

Iginlansar diri pala maiha an asembleya agud utro nga tukuron an tsapter han PKM ha baryo. Gin-abrihan an aktibidad ha oryentasyon ha seguridad. Gindayaw han kumander han hukbo an kaisog han masa nga nagduso nga igpadayon an masmiting ha luyo nga tulo kakilometro la tikang ha ira pwesto an nag-ooperasyon nga militar.

Ha masmiting, sistematiko nira nga ginhisgutan, ha pangunguna han instruktor ha pulitika han hukbo, an nakaandam nga mga dokumento han pagsusuma han paggios ha lugar, kasaysayan, urhi nga resulta han pankatilingban nga imbestigasyon, suhetibo nga sitwasyon, istruktura ngan katungdanan, 1-katuig nga Programa ngan mga palisiya han rebolusyunaryo nga organisasyon masa ha baryo. Nagduon hira ha rebolusyunaryo nga kasaysayan han baryo. Linandaw an diskusyon ha bubligay han bug-os nga kagiusan tikang pa dekada 1960 ha panahon han KM, dekada 1970 ha panahon han balaud militar ni Marcos Sr, ngan pag-abot ngan paggios han hukbo han katawhan ha baryo hasta ha presente.

Antes an aktibidad, iginhimo an serye han mga miting-konsultasyon han Partido, yunit han BHB ngan responsable nga lider masa ha baryo. Naghimo han komprehensibo nga plano basar ha kabug-usan nga plano han komite ha prente ngan seksyon komite ngan ha aktwal nga gios han kaaway. Ha sakob han usa kasemana, nahitalaan an mga buruhaton ngan rekisitos ha pagpapatuman han plano sugad han sumada, imbestigasyon ngan pabubug-os han plano. Iginhimo an patikang nga miting agud hisgutan an mga borador ngan adman an igin-andam nga mga dokumento. Ginhimo nga kampanya an pag-uurusa ha bug-os nga organisado nga masa hini nga mga dokumento kadungan an kampanya ha pag-aaram han Rebolusyon. Ginhimo liwat nga kampanya an pagrebyu ha rebolusyunaryo nga giya ha reporma nga agraryo, nga usa ha batakan nga dokumento han PKP.

Ikaduha nga parte: Kagiusan pagtutul-id ngan an pagtutukod han asosasyon masa.