Abusado nga warden ha prisuhan ha Negros, gintanggal. Napatanggal hadton Agosto 28 an abusado nga warden nga hi Atty. Crisyrel P. Awe han Negros Occidental District Jail-Male Dormitory kahuman an 4-kaadlaw nga protesta han mayda 600 nga priso, kaupod an mga priso pulitikal. Baton nira an paggios ha luun-luon nga mga kaso han pagtalapas ha ira katungod ha sakob han prisuhan ha pangunguna ni Awe. Kalakip ha mga basaranan han pagpapaliwan kan Awe an mga kaso nga pan-gigipit ngan panarhug ha mga lider han priso, diri pagtuman ha nahiuna nga mga kasarabutan ngan iba nga diri-makatudungan nga sistema. Nagpiket liwat ha gawas han prisuhan an mga pamilya han priso komo suporta.

Iglutaw an mga desaparesido. Nagprotesta ha Manila an Desaparecidos Philippines ngan mga grupo ha tawhanon nga katungod hadton Agosto 30 komo paghandum ha International Day of the Disappeared. Panawagan nira nga iglutaw an ngatanan nga mga ginsikmit ngan piniritay nga ginpawara han mga pwersa han estado han Pilipinas. Ilarum han rehimen Marcos, diri mamenos ha 15 an biktima han piniritay nga pagpawara. Naglansar hin kapareho nga mga protesta ha syudad han Baguio, Iloilo, ngan Cebu, ngan ha Los Baños ha Laguna.

Mga migrante ha US, nagkaurusa. Aada ha 850 nga migrante ha US, kaupod an mga Pilipino, an nagprotesta ha Tacoma, Washington agud ipanawagan an pagpaundang ha diri makatawo nga pagtratar ha mga nakapriso ha mga pasilidad han ICE, paglanat ha mga migrante ngan diri makatadungan nga deportasyon. Iginhimo an paggios kahuman iglansar an kumperensya nga nag-urusa ha 100 nga organisasyon tikang ha US ngan ha iba nga nasud ha Defend Migrants Alliance.