Tanggalay ha Wyeth, gintipahan. Ginsukna han Wyeth Philippines Progressive Workers Union (WPPWU-DFA- KMU) an iskema nga “cluster crew” nga plano nga ipatuman han kompaniya ha pabrika. Sigon ha unyon, pamaagi ini han pleksibilisasyon nga magdudugang han trabaho ha trabahador, pagbalhin ha iba nga seksyon ha produksyon, ngan posible mahingadto ha tanggalay.

Linutaw an plano nga pagpapatuman han “cluster crew” ha panahon nga naghihimo han negosasyon an mga tinaglawas han WPPWU ngan pamunuan han Wyeth para ha bag-o nga CBA nga gintikangan hadton Hunyo. Iginpapasulong han unyon ha negosasyon an ₱15,000 dugang nga suhol ha sakob han tulo katuig, dugang nga mga benepisyo, ngan regularisasyon ha mga kontrakwal.

Ika-100 kaadlaw han welga ha Kawasaki, ginhinumdom. Nagtirok an mga trabahador han Kawasaki United Labor Union (KULU) hadton Agosto 29 para hinumduman an ika-100 kaadlaw han ira welga nga gintikangan hadton Mayo tungod ha deadlock ha negosasyon ha CBA. Nagprograma hira ha atubangan han Kawasaki Motors Phils Corporation (KMPC) ha Muntinlupa City. Nakig-usa ha programa an Kilusang Mayo Uno ngan mga unyon hini.

Trabahador nga gintanggal ha Nexperia, nahibalik. Kataliwan han pira kabulan nga pag-iinsister ngan pagsalawad han kaso ha Dole, nahidaug hadton Agosto 18 han Nexperia Philippines Inc Workers Union (NPIWU-NAFLU-KMU) an pagpapabalik ha trabaho han duha nga trabahador ngan lider han unyon nga iligal nga gintanggal han kapitalista. Sigon ha desisyon, kinahanglan mahibalik an duha ha ira daan nga posisyon, igpabilin an ira seniority rights, ngan baydan an tanan nga waray nira makarawat nga suhol ngan benepisyo tikang Marso 10 tubtub ha ira pagbalik ha trabaho. Gintanggal an duha, kaupod an duha pa nga upisyal han unyon, hadton Disyembre 2024 ha akusasyon nga “pag-ulang” ha sulod-gawas han mga produkto ha kompaniya.