Giambus sa usa ka yunit sa Bagong Hukbong Bayan (BHB)-Albay (Santos Binamera Command) ang nag-operasyong 16-katawong iskwad sa 49th IB niadtong Agosto 21 sa Barangay Palapas, Ligao City, Albay. Dili moubos sa tulo ka pasistang sundalo ang napatay ug usa pa ang nataho nga nasamdan.

Matud sa taho sa BHB-Albay, nagsulay ang mga tropa sa 49th IB nga moduol sa gipondohan sa hukbong bayan aron ireyd ang yunit. Matud niini, nabantayan sa masa ang lihok sa pasistang mga tropa maong nakahimo dayon og mahukmanong lakang ang yunit sa hukbo para atakehon kini.

Sa Negros Occidental, giambus sa BHB-South Central Negros (Romeo Nanta Command) ang tropa sa 94th IB ug CAFGU nga nag-operasyon sa Sityo Balao, Barangay Tan-awan, Kabankalan City niadtong Setyembre 4. Tulo ang nasamdan sa mga pasistang sundalo.

Aktibong depensa. Sa Aurora, usa ka sundalo sa 91st IB ang nasamdan sa aktibong pagdepensa sa usa ka yunit sa BHB-Aurora (Domingo Erlano Command) niadtong Agosto 21 sa hapon sa Sityo Aguses, Barangay Matawe, Dingalan. Tulo ka bulan na ang focused and sustained military operations sa 91st IB sa Dingalan ug kasikbit nga mga lungsod niini.

Sa miaging mga semana, sunud-sunod ang nataho nga mga armadong aksyon ug aktibong depensa sa mga yunit sa BHB batok sa nagaatakeng tropa sa Armed Forces of the Philippines. Gawas sa Albay ug Aurora, nahitabo usa kini sa Masbate, Oriental Mindoro, Quezon, ug Capiz.

Gipanghimakak sa mga serye sa maong mga panagsangka ang pamahayag ni Ferdinand Marcos Jr niadtong Hulyo nga “wala nay grupong gerilya” sa nasud.