Gin-ambus sang isa ka yunit sang Bagong Hukbong Bayan (BHB)-Albay (Santos Binamera Command) ang naga-operasyon nga 16 ka tawo nga iskwad sang 49th IB sadtong Agosto 21 sa Barangay Palapas, Ligao City, Albay. Indi magnubo sa tatlo ka pasista nga soldado ang napatay kag isa pa ang nareport nga napilasan sa ambus.

Suno sa report sang BHB-Albay, nagtilaw ang mga tropa sang 49th IB nga magpalapit sa ginakampuhan sang hukbo sang banwa para i-reyd ang yunit. Suno diri, nabantayan sang masa ang hulag sang pasistang tropa gani gilayon nga nakahimo sang desaysibo nga tikang ang yunit sang hukbo agud iguon ini.

Sa Negros Occidental, gin-ambus sang BHB-South Central Negros (Romeo Nanta Command) ang tropa ang 94th IB kag CAFGU nga naga-operasyon sa Sityo Balao, Barangay Tan-awan, Kabankalan City sadtong Septyembre 4. Tatlo ang napilasan sa mga pasista nga soldado.

Aktibo nga depensa. Sa Aurora, isa ka soldado sang 91st IB ang napilasan sa aktibo nga depensa sang isa ka yunit sang BHB-Aurora (Domingo Erlano Command) sadtong Agosto 21 sang hapon sa Sityo Aguses, Barangay Matawe, Dingalan. Tatlo ka bulan na ang focused and sustained military operations sang 91st IB sa Dingalan kag katambi nga mga banwa sini.

Sa nagligad nga mga semana, asod-asod ang nareport nga mga armadong aksyon kag aktibo nga depensa sang mga yunit sang BHB batuk sa naga-atake nga mga tropa sang Armed Forces of the Philippines. Magluwas sa Albay kag Aurora, nalista ang mga ini sa Masbate, Oriental Mindoro, Quezon, kag Capiz.

Ginahimutig sang serye sang mga awayan nga ini ang pahayag ni Ferdinand Marcos Jr sadtong Hulyo nga “wala na sang grupong gerilya” sa pungsod.