Kakasanay sa Wyeth, ginpamatukan. Ginbatikos sang Wyeth Philippines Progressive Workers Union (WPPWU-DFA-KMU) ang iskema nga “cluster crew” nga plano nga ipatuman sang kumpaniya sa pabrika. Suno sa unyon, pamaagi ini sang pleksibilisasyon nga dugangan trabaho ang mamumugon, pagsaylo sa iban nga seksyon sa produksyon, kag posible nga magdangat sa kakasanay.

Nagtuhaw ang plano nga pagpatuman sang “cluster crew” sa panahon nga nagapatigayon sang negosasyon ang mga tiglawas sang WPPWU kag pamunuan sang Wyeth para sa bag-o nga CBA nga ginsugdan sadtong Hunyo. Ginasulong sang unyon sa negosasyon ang ₱15,000 dugang nga sweldo sa sulod sang tatlo ka tuig, dugang nga mga benepisyo, kag regularisasyon sang mga kontraktwal.

Ika-100 ka adlaw nga welga sa Kawasaki, gindumdom. Nagtipon ang mga mamumugon sang Kawasaki United Labor Union (KULU) sadtong Agosto 29 para dumdumon ang ika-100 nga adlaw sang ila welga nga ginkasa sadtong Mayo tungod sa deadlock sa negosasyon sa CBA. Nagprograma sila sa atubang sang hedkwarters sang Kawasaki Motors Phils Corporation (KMPC) sa Muntinlupa City. Nag-ugyon sa programa ang Kilusang Mayo Uno kag mga unyon sini.

Mamumugon nga ginkakas sa Nexperia, napabalik. Pagkatapos sang pila ka bulan nga pagpang-ipit kag pagpasaka sang kaso sa Dole, napadaog sadtong Agosto 18 sang Nexperia Philippines Inc. Workers Union (NPIWU-NAFLU-KMU) ang pagpabalik sa trabaho sang duha ka mamumugon kag lider sang unyon nga iligal nga ginkakas sang kapitalista. Suno sa desisyon, dapat mapabalik ang duha sa ila sadto pusisyon, ipabilin ang ila seniority rights, kag bayaran ang tanan nga wala nila mabaton nga sweldo kag benepisyo halin Marso 10 tubtob sa ila pagpabalik-trabaho. Ginkakas ang duha, kaupod ang duha pa ka opisyal sang unyon, sadtong Disyembre 2024 sa akusasyon nga “pagpugong” sa pag-guwa-sulod sang mga produkto sa kumpaniya.