Pagpanangtang sa Wyeth, gibabagan. Gimakmak sa Wyeth Philippines Progressive Workers Union (WPPWU-DFA-KMU) ang iskemang “cluster crew” nga planong gipaptuman sa kumpanya sa pabrika. Matud sa unyon, pamaagi kini sa pleksibilisasyon nga magdugang og trabaho sa mamumuo, pagbalhin sa ubang seksyon sa produksyon, ug lagmit mosangko sa pagpanangtang.

Mitumaw ang planong pagpatuman sa “cluster crew” atol sa negosasyon sa mga representante sa WPPWU ug management sa Wyeth alang sa bag-ong CBA nga gisugdan niadtong Hunyo. Gipanghingusog sa unyon sa negosasyon ang ₱15,000 dugang suhulan sulod sa tulo ka tuig, dugang nga mga benepisyo, ug regularisasyon sa mga kontraktwal.

Ika-100 adlaw sa welga sa Kawasaki, gidumdum. Nagtapok ang mga mamumuo sa Kawasaki United Labor Union (KULU) niadtong Agosto 29 aron dumdumon ang ika-100 nga adlaw sa ilang welga nga gikasa niadtong Mayo tungod sa deadlock sa negosasyon sa CBA. Nagprograma sila atubangan sa hedkwarters sa Kawasaki Motors Phils Corporation (KMPC) sa Muntinlupa City. Nakighiusa sa programa ang Kilusang Mayo Uno ug mga unyon niini.

Mamumuong gitangtang sa Nexperia, napabalik. Human ang pipila ka bulang pagduso ug pagpasaka og kaso sa Dole, napadaug niadtong Agosto 18 sa Nexperia Philippines Inc. Workers Union (NPIWU-NAFLU-KMU) ang pagpabalik sa trabaho sa duha ka mamumuo ug lider sa unyon nga iligal nga gitangtang sa kapitalista. Matud sa desisyon, angayang mabalik ang duha sa ilang kanhing pusisyon, ipabilin ang ilang seniority rights, ug bayran ang sweldo ug benepisyo nga wala nila nadawat gikan Marso 10 hangtud sa ilang pagbalik sa trabaho. Gitangtang ang duha, uban ang duha pa ka upisyal sa unyon, niadtong Disyembre 2024 sa akusasyong “pagharang” sa pagsulod-gawas sa mga produkto sa kumpanya.