Sunod-sunod nga protesta ang ginlunsar sang mga progresibo nga grupo batuk sa rehimen Marcos kag mga kontratista nga imbolbado sa korapsyon kag anomaliya sa mga proyektong flood control kag iban pa nga imprastruktura. Ginpatigayon ang mga hublag sadtong Septyembre 4 kag Septyembre 5 sa pagpanguna sang Bayan. May yara man sang dalagan batuk sa korapsyon sa University of the Philippines-Diliman sadtong Septyembre 7 nga ginpakigbahinan sang masobra 1,000 ka tawo.

Ginsulong kag gintay-og sang mga grupong pangkapalibutan kag biktima sang mga kalamidad sadtong Septyembre 4 ang opisina sa Pasig City sang St. Gerrard Construction, ginapanag-iyahan sang mga Discaya, nga isa sa mga kontratista nga imbolbado sa korapsyon ilabi na sa bulok nga mga proyektong flood control. Ginbato nila sang lunang ang logo sang trangkahan sang kumpaniya bilang pagpakita sang ila kaakig.

Sa amo nga adlaw, ginsulong sang mga katapo sang Anakbayan ang pungsodnon nga opisina sang DPWH sa Manila. Kadungan sini ang protesta sang grupo KYUSI 4 Truth and Accountability sa Quezon City kag sang Bayan-National Capital Region kag ONE Taft sa Pedro Gil. Sa Marikina City, nagprotesta ang mga kababaehan sa pagpanguna sang Gabriela Women’s Party.

Sadtong Septyembre 5, ululupod ang mga grupo sa pagtay-og sa House of Representatives sa Quezon City agud pakamalauton ang DPWH kag si Marcos. Gintuon nila ang hublag sa pag-hearing para sa badyet sang departamento. Isa ka protesta man ang ginpangunahan sang Bayan-Central Visayas sa DPWH Region 7 sa Cebu City. Sa Pampanga kag Bulacan,nagprotesta ang Bayan-Central Luzon sa nagligad nga semana.