Sunud-sunod nga protesta ang gilunsad sa mga progresibong grupo batok sa rehimeng Marcos ug mga kontratistang nalambigit sa korapsyon ug kahiwian sa mga proyektong flood control ug uban pang imprastruktura. Gihimo ang mga protesta niadtong Setyembre 4 ug Setyembre 5 sa pagpasiugda sa Bayan. Nagpahigayon usab og fun run batok sa korapsyon sa University of the Philippines-Diliman niadtong Setyembre 7 nga gisalmutan sa kapin 1,000 ka tawo.

Gidagsang ug gilamba sa mga grupong maki-kinaiyahan ug biktima sa mga kalamidad niadtong Setyembre 4 ang upisina sa Pasig City sa St. Gerrard Construction, gipanag-iya sa mga Discaya, nga usa sa mga kontratistang imbwelto sa korapsyon ilabina sa dunot nga mga proyektong flood control. Gilabay nila og lapok ang logo ug ganghaan sa kumpanya isip pagpadayag sa ilang kasuko.

Sa susamang adlaw, gidagsang sa mga myembro sa Anakbayan ang nasudnong upisina sa DPWH sa Maynila. Dungan niini ang protesta sa grupong KYUSI 4 Truth and Accountability sa Quezon City ug sa Bayan-National Capital Region ug ONE Taft sa Pedro Gil. Sa Marikina City, nagprotesta ang mga kababayen-an sa pagpanguna sa Gabriela Women’s Party.

Niadtong Setyembre 5, nagtapok ang mga grupo sa House of Representatives sa Quezon City aron makmakon ang DPWH ug si Marcos. Giatol nila ang protesta sa pagdungog sa badyet sa ahensya. Usa ka protesta usab ang gipangulohan sa Bayan-Central Visayas sa DPWH Region 7 sa Cebu City. Sa Pampanga ug Bulacan, nagprotesta ang Bayan-Central Luzon sa miaging semana.