Abusado nga warden sa bilangguan sa Negros, napalayas. Napalayas sadtong Agosto 28 ang abusado nga warden nga si Atty. Crisyrel P. Awe sang Negros Occidental District Jail-Male Dormitory pagkatapos sang 4-adlaw nga protesta sang may 600 ka bilanggo, kaupod ang mga bilanggong pulitikal. Ang hublag sabat nila sa sampaw-sampaw nga mga kaso sang paglapas sang ila kinamatarung sa sulod sang bilangguan sa pagpanguna ni Awe. Lakip sa mga basehan sa pag-ilis kay Awe ang mga kaso sang pagpang-ipit kag pagpanghadlok sa mga lider sang bilanggunan, indi pagtuman sang nauna nga mga kasugtanan kag iban pa nga indi makatarungan nga pagpalakat. Nagpiket man sa guwa sang bilangguan ang mga pamilya sang mga bilanggo bilang suporta.

Ipatuhaw ang mga desaparasido. Nagprotesta sa Manila ang Desaparecidos Philippines kag mga grupo sa tawhanon nga kinamatarung sadtong Agosto 30 bilang pagdumdom sa International Day of the Disappeared. Panawagan nila nga ipatuhaw ang tanan nga mga gin-abdak kag pilit nga gindula sang mga pwersa sang estado sang Pilipinas. Sa idalum sang rehimen Marcos, indi magnubo sa 15 ang biktima sang pwersa nga pagkadula. Naglunsar man sang amo nga protesta sa syudad sang Baguio, Iloilo, kag Cebu, kag sa Los Baños sa Laguna.

Mga migrante sa US, naghugpong. Mga 850 ka migrante sa US, lakip ang mga Pilipino, ang nagprotesta sa Tacoma, Washington agud ipanawagan ang pag-untat sa indi makatawo nga pagtrato sa mga napriso sa mga pasilidad sang ICE, paglagas sa mga migrante kag indi makatarungan nga deportasyon. Ginpatigayon ang hublag pagkatapos hiwaton ang kumperensya nga nagahugpong sa 100 ka organisasyon halin sa US kag sa iban nga pungsod sa Defend Migrants Alliance.