Abusadong warden sa prisohan sa Negros, napalagpot. Napalagpot niadtong Agosto 28 ang abusadong warden nga si Atty. Crisyrel P. Awe sa Negros Occidental District Jail-Male Dormitory human ang 4 ka araw nga protesta sa mokabat 600 ka priso, lakip ang mga bilanggong pulitikal. Tubag ang maong protesta sa patung-patong nga mga kaso sa paglapas sa ilang katungod sulod sa prisohan sa pagpasiugda ni Awe. Lakip sa mga basihan sa pagpalagpot kang Awe mao ang mga kaso sa pagpamig-ot ug pagpanghadlok sa mga lider sa mga priso, dili pagtuman sa naunang mga kasabutan ug lain pang dili makatarunganong kahamtangan. Nagpiket usab sa gawas sa prisohan ang mga pamilya sa piniriso isip suporta.

Ilutaw ang mga desaparesido. Nagprotesta sa Maynila ang Desaparecidos Philippines ug mga grupo sa tawhanong katungod niadtong Agosto 30 isip pagdumdum sa International Day of the Disappeared. Panawagan nilang ilutaw ang tanang mga gidagit ug pugos nga giwala sa mga pwersa sa estado sa Pilipinas. Ubos sa rehimeng Marcos, dili moubos sa 15 ang biktima sa pugos nga pagkawala. Naglunsad og susamang mga protesta sa syudad sa Baguio, Iloilo, ug Cebu, ug sa Los Baños sa Laguna.

Mga migrante sa US, naghugpong. Anaa sa 850 ka migrante sa US, lakip ang mga Pilipino, ang nagprotesta sa Tacoma, Washington aron ipanawagan ang paghunong sa dili makitawhanong pagtrato sa mga piniriso sa mga pasilidad sa ICE, pagsumpo sa mga migrante ug dili makatarunganong deportasyon. Gihimo ang protesta human gilunsad ang kumperensyang naghugpong sa 100 ka organisasyon gikan sa US ug sa ubang nasud sa Defend Migrants Alliance.