Niining milabayng mga bulan, sunud-sunod ang mga war games nga gilunsad sa Australia sa Pilipinas. Kini subay sa estratehikong plano sa pagpanalipud sa hegemonya sa US sa Asia-Pacific, kung asa daku ang bentahe sa Australia.

Usa sa mga war games mao ang Alon 2025, nga gilunsad sa kayutaan ug kadagatan sa Palawan, Mindoro ug uban pang bahin sa Luzon. Sa maong war games, nagpadala ang Australia og pinakadakung ihap sa mga sundalo sa Southeast Asia sukad nga nanginlabot kini sa East Timor niadtong 1999. Ayha niini, gilunsad sa Australia ang Kasangga 2025, usa ka pagbansay sa kontra-insurhensiya sa Camp Kibaritan sa Bukidnon.

Ning bag-o, giduso na usab sa Australia ang pagtukod og kaugalingon niining mga base sa Pilipinas aron iakumudar ang nagkadaghang tropa ug ilang mga gamit sa nasud. Niadtong Agosto 22, gipirmahan sa mga upisyal sa depensa sa Australia ug Pilipinas ang Statement of Intent for Enhanced Defense Cooperation aron hatagag dalan ang maong laraw. Nakatakdang ipinal ang kasabutan sa 2026.

Gihatagag dalan sa maong kasabutan ang permanenteng pagpwesto sa mga tropa sa Australia sa Pilipinas, paglunsad og dinagkung war games ug pagpamuhunan sa “imprastrukturang pangdepensa” o mga base militar. Ang maong kasabutan masusama sa Enhanced Defense Cooperation Agreement (EDCA) tali sa Pilipinas ug US, nga nagayatak sa soberanya sa nasud ug maghikot sa nasud sa mga armadong kaguliyang nga ginapaypayan sa US.

Dugang ang mga tropa, sakyanan ug gamit iggugubat sa Australia sa higante nang makinarya militar sa US nga gibutang sa Pilipinas.

Samtanag, lain na usab nga baseng nabal ang giablihan sa AFP, sa direksyon sa US, sa Mahatao, Batanes niining Setyembre. Ang base kabahin sa kutay sa mga forward operating base nga ginapwesto sa US sa mga isla sa Batanes (aduna pay usa sa isla sa Mavulis) tungod sa gidul-on niini sa Taiwan.

Sa lambigit nga balita, nabutyag ang pag-abli sa rehimeng Marcos sa Camp Cape Bojeador sa Burgos, Ilocos Norte aron mahimong tipiganan og bala sa US. Kini nga mga bag-ong lakang labaw nga nagguyod sa Pilipinas sa gipagrabeng pagpanghagit og gubat sa US sa China.