Sining nagligad nga mga binulan, asod-asod ang mga war games nga ginlunsar sang Australia sa Pilipinas. Ang mga ini santo sa estratehikong plano sa pagdepensa sang hegemoniya sang US sa Asia-Pacific, kon diin dako ang bentaha sang Australia.

Isa sa mga war games ang Alon 2025, nga ginpatigayon sa duta kag kadagatan sang Palawan, Mindoro kag iban pa nga bahin sang Luzon. Sa war games nga ini, nagpadala ang Australia sang pinakadamo nga isip sang mga soldado sa Southeast Asia halin sang nagpasilabot ini sa East Timor sadtong 1999. Antes sini, ginlunsar sang Australia ang Kasangga 2025, isa ka paghanas sa kontra-insurhensya sa Camp Kibaritan sa Bukidnon.

Sini lang, ginduso na sang Australia ang pagtukod sang kaugalingon sini nga mga base sa Pilipinas agud paestaran sang nagadako nga isip sang ila tropa kag ila mga gamit sa pungsod. Sadtong Agosto 22, ginpirmahan sang mga opisyal sa depensa sang Australia kag Pilipinas ang Statement of Intent for Enhanced Defense Cooperation para hatagan ligwa ang katuyuan nga ini. Nakatalana nga ipinal ang kasugtanan sa 2026.

Ginahatagan ligwa sang kasugtanan nga ini ang permanente nga pagpwesto sang mga tropa sang Australia sa Pilipinas, paglunsar sang mga dalagko nga war games kag pangapital sa “imprastrukturang pangdepensa” ukon mga base militar. Ang ini nga kasugtanan mangin kaangay sang Enhanced Defense Cooperation Agreement (EDCA) sa tunga sang Pilipinas kag US, kag nagatapak sa sobereniya sang pungsod kag magahigot sa pungsod sa mga armadong kagamo nga ginapaypayan sang US.

Dugang ang mga tropa, salakyan kag gamit pang-gyera sang Australia sa higante nga makinarya militar sang US nga nakalatag sa Pilipinas.

Samtang, isa naman ka baseng nabal ang ginbuksan sang AFP, sa direksyon sang US, sa Mahatao, Batanes sining Septyembre. Ang base kabahin sang mga kudal sang mga forward operating base nga ginpatindog sang US sa mga isla sang Batanes (may isa pa sa isla sang Mavulis) tungod sa kalapiton sini sa Taiwan.

Sa angot nga balita, nabuyagyag ang pagbukas sang rehimen Marcos sa Camp Cape Bojeador sa Burgos, Ilocos Norte agud mangin tambakan sang bala sang US. Ang ulihi nga tikang nga ini mas nga nagaguyod sa Pilipinas sa ginapasingki nga kagamo sang US batuk sa China.