Bitbit ang mga plakard, bandera, ug megaphone, pursigidong ginaasdang sa kabatan-onang Pilipino ang ilang makinasudnon ug demokratikong pakigbisog atubangan sa gipagrabeng atake sa rehimeng Marcos ug National Task Force-Elcac batok kanila. Wala sila nahadlok nga pahilumon, ug mibalibad nga mahimong amang ug miyukbo sa pasistang dikta sa estado.

Sa miaging mga semana, lain-laing aktibidad ang gipangunahan ug gisalmutan sa kabatan-onan aron ibutyag ug batukan ang kontra-katawhang mga palisiya sa rehimeng Marcos. Sulod ug gawas sa mga eskwelahan, mitampo sila sa mga pakigbisog sa katawhan.

Protesta sa mga unibersidad

Gatusan ka kabatan-onang-estudyante ang misalmot sa mga demonstrasyon ug aktibidad sa pribado ug pangpublikong unibersidad aron sugaton ang pag-abli sa klase sa miaging bulan. Ilang gidut-an sa mga protesta ang isyu sa edukasyon, pagpanalipud sa ilang demokratikong katungod, ug pagbatok sa pagpig-ot sa akademikong kagawasan.

Kapin 1,300 ka kabatan-onan ang nagprotesta sa Polytechnic University of the Philippines (PUP) sa Sta. Mesa niadtong Setyembre 2 aron sumpuon ang bag-ong akademikong tuig. Sa University of the Philippines (UP)-Los Baños, mikabat sa 500 ka mga estudyante ang nagprotesta niadtong Agosto 12. Gatusan usab ang misalmot sa mga rali sa uban pang kampus sa UP gikan Baguio, hangtud Diliman, bisan sa Visayas ug Mindanao.

Gihimo usab ang mga protesta sa Technological University of the Philippines Manila, Cavite State University, Southern Luzon State University sa Quezon, sa Bicol University, ug Western Visayas State University sa Iloilo.

Human ang pipila ka tuig, subli usab nga nagkatapok niadtong Agosto 30 sa Tabuk City ang Samahan ng mga Mag-aaral sa Kalinga, usa ka organisasyon sa Kalinga State University (KSU). Kanhing giila ang grupo sa unibersidad apan nahunong dihang gi-red-tag kini sa duso sa NTF-Elcac ug AFP niadtong 2021.

Sa mga pribadong eskwelahan, nagkasa og protesta ang mga kabatan-onan sa Saint Louis University sa Baguio City, sa Adamson University, Ateneo de Manila University, ug De La Salle University ug uban pang unibersidad. Wala sila nahadlok sa pagpanumpo sa administrasyon, sa hulga sa suspensyon ug uban pang silot.

Sa gawas sa kampus

Wala nahikot ang kabatan-onan sa mga isyu sulod sa kampus. Militante silang nagmartsa sa mga kalsada uban ang mga mamumuo ug kabus sa kasyudaran, ug miadto sa kabanikanhan aron makighiusa sa masang mag-uuma ug mga nasudnong minorya.

Uban sila karon sa pagbatikus sa katawhan sa kahiwian ug puno sa korapsyon nga mga proyektong flood control ug mga imprastruktura. Gidagsang nila ug gibuno og lapok ug dunot nga utan ang upisina sa mga kontratista ug sa Department of Public Works and Highways ug gipapanubag ang rehimeng Marcos.

Miduyog sila sa pagbatok sa demolisyon sa mga residente sa Smokey Mountain ug Malara sa Tondo. Padayon silang misuporta sa pakigbisog sa mga mamumuo ug unyon sa Nexperia, welga sa Kawasaki, ug miuban sa mga piketlayn.

Gipatigbabawan nila ang kahadlok ug kabangis nga ginasabwag sa militar sa kabanikanhan sa pagsalmot sa mga fact-finding mission sa Mindoro ug Quezon. Ginagamit nila ang social media para ibutyag sa publiko ang nagkadaghang mga kaso sa paglapas sa tawhanong katungod sa kabanikanhan.

Bisan ang mga kabatan-onang Pilipino sa abrod nanguli sa Pilipinas aron motambo sa pakigbisog sa katawhan. Sa miaging mga bulan, gatusan ka kabatan-onan gikan US ang mibisita sa Pilipinas aron mokat-on sa pagkigbisog sa mga sektor.

Wala nahadlok ang kabatan-onan sa gasgas nang pakana sa NTF-Elcac nga pagtawag sa mga aktibidad sa sektor isip “terror grooming.” Mapangahasong ginahuptan karon sa kabatan-onang Pilipino ang hinanaling tahas sa pagpukaw, pag-organisa ug pagpalihok sa masang anakpawis. Ginapanday nila ang kaugalingon ug giabaga ang sakripisyo isip mga bag-ong manununod sa pakigbisog sa katawhang Pilipino.