Dala ang mga plakard, bandera, kag megaphone, pursigido nga ginasulong sang pamatan-on nga Pilipino ang ila pungsodnon kag demokratiko nga paghimakas sa atubang sang ginpasingki nga atake sang rehimen Marcos kag National Task Force-Elcac batuk sa ila. Wala sila nagapabusal, kag nagapamalibad nga mahadlok kag magduko sa pasistang dikta sang estado.

Sa nagligad nga mga semana, lain-lain nga aktibidad ang ginpangunahan kag ginpakigbahinan sang pamatan-on agud ibuyagyag kag batikuson ang kontra-pumuluyo nga mga patakaran sang rehimen Marcos. Sa sulod kag guwa sang mga eskwelahan, nagapakigbahin sila sa mga paghimakas sang pumuluyo.

Hublag sa mga unibersidad

Ginatos ka pamatan-on-estudyante ang nagpakigbahin sa mga demonstrasyon kag aktibidad sa pribado kag pangpubliko nga unibersidad agud sug-alawon ang pagbukas sang klase sa nagligad nga bulan. Unod sang ila hublag ang isyu sa edukasyon, pagtib-ong sang ila demokratiko nga kinamatarung, kag pakigbato sa pagkuga sa akademiko nga kahilwayan.

Masobra 1,300 ka pamatan-on ang nagprotesta sa Polytechnic University of the Philippines (PUP) sa Sta. Mesa sadtong Septyembre 2 para sugdan ang bag-o nga akademiko nga tuig. Sa University of the Philippines (UP)-Los Baños, nag-abot sa 500 ang naghulag nga mga estudyante sadtong Agosto 12. Ginatos man ang nagpakigbahin sa mga rali sa iban pa nga kampus sang UP halin Baguio, padulong Diliman, tubtob Visayas kag Mindanao.

Ginpatigayon man ang mga hublag sa Technological University of the Philippines Manila, Cavite State University, Southern Luzon State University sa Quezon, sa Bicol University, kag Western Visayas State University sa Iloilo.

Pagkatapos sang pila ka tuig, liwat naman nga nagtipon sadtong Agosto 30 sa Tabuk City ang Samahan ng mga Mag-aaral sa Kalinga (Asosasyon sang mga Estudyante sa Kalinga), isa ka organisasyon sa Kalinga State University (KSU). Ang grupo sadto ginkilala sang unibersidad apang nauntat sang gin-red-tag, sa duso sang NTF-Elcac kag AFP sadtong 2021.

Sa mga pribado nga eskwelahan, nagkasa sang hublag ang mga pamatan-on sa Saint Louis University sa Baguio City, sa Adamson University, Ateneo de Manila University, kag De La Salle University kag iban pa nga unibersidad. Wala sila nagpatay-og sa pagpang-ipit sang administrasyon, pamahog sang suspensyon kag iban pa nga pangsilot nga tikang.

Sa guwa sang kampus

Wala nagpahigot ang pamatan-on sa mga isyu sa sulod sang kampus. Militante sila nga nagmartsa sa mga dalanon kaupod ang mga mamumugon kag imol nga taga-syudad, kag nagpadulong sa kaumhan agud makig-isa sa masang mangunguma kag mga pungsodnon nga minorya.

Kaupod subong ang mga pamatan-on sa pumuluyo sa pagbatikos sang maanomaliya kag puno sang korapsyon nga mga proyektong flood control kag mga imprastruktura. Ginsulong nila kag ginbato sang lutak kag dunot nga utanon ang opisina sang mga kontratista kag sang Department of Public Works and Highways kag nagpanawagan sang salabton sang rehimen Marcos.

Nag-upod sila sa kubay sang mga residente sa Smokey Mountain kag Malara sa Tondo batuk sa demolisyon. Padayon sila nga nagasuporta sa away sang mga mamumugon kag unyon sa Nexperia, welga sa Kawasaki, kag nagkadto sa mga piketlayn.

Ginpangibabawan nila ang kahadlok kag kakugmat nga ginawas-ag sang militar sa kaumhan sa pagpakigbahin sa mga fact-finding mission sa Mindoro kag Quezon. Ginagamit nila ang social media agud ibuyagyag sa publiko ang nagadamo nga mga kaso sang paglapas sa tawhanon nga kinamatarung sa kaumhan.

Bisan ang mga pamatan-on nga Pilipino sa luwas sang pungsod nagpauli sa Pilipinas agud makig-upod sa mga paghimakas sang pumuluyo. Sa nagligad nga mga binulan, puluan ka pamatan-on halin sa US ang nagbisita sa Pilipinas agud magtuon sa pakig-away sang mga sektor.

Ginabalewala sang mga pamatan-on ang gasgas na nga padihot sang NTF-Elcac nga pagbansag sa mga aktibidad sang sektor bilang “terror grooming.” Makahas nga ginadala subong sang Pilipinong pamatan-on ang hugot nga katungdanan sa pagpukaw, pag-organisa kag pagpahulag sa masang anakbalhas. Ginapanday nila ang kaugalingon kag gina-abaga ang sakripisyo bilang mga masunod nga tigpanubli sang paghimakas sang pumuluyong Pilipino.