Gikundena sa katawhan sa Dupax Del Norte, Nueva Vizcaya ang planong pagmina sa ilang komunidad. Niadtong Agosto 4, gihatagan ang Mines and Geosciences Bureau ang Woggle Corporation, kumpanyang nakabase sa United Kingdom, og exploration permit aron tukion ang mineral nga makuha sa lungsod. Planong sakupon sa kumpanya ang 3,102 ektaryang kayutaan sa lima ka barangay o 10% sa kinatibuk-ang kayutaan sa maong lungsod.

Nagpagawas dayon og resolusyon ang barangay Oyao ug ang sanggunian bayan batok sa mina, nga nagmando sa pagkansela sa nahitabong mining exploration sa lungsod. Nagpadayag og pagkundena ang Diocese sa Bayombong. Naglunsad og signature campaign ang mga residente.

Nanawagan usab ang komunidad sa Barangay Bulalacao, Mankayan, Benguet sa pagkansela sa permit sa Crescent Mining Development Corporation (CMDC) para sa Mineral Production Sharing Agreement nga subling gihatag sa kumpanya bisan wala kini free, prior and informed consent gikan sa mga lumad ug certification of precondition, nga gitakda sa reaksyunaryong balaod.

Anaa sa 534 ka ektarya nga langkub sa yutang kabilin ang sakop sa proyekto ug gitanyag usab sa kumpanya ang dugang 300 ektarya sa parehong lugar. Hulga ang operasyon sa kapin 600 ka pamilya nga nagsalig sa pag-uma sa yutang kabilin. Ang CMDC gipanag-iyahan sa Asean Copper, nga 40% niini iya sa usa ka kumpanyang Australian.