Ginpakamalaut sang pumuluyo sang Dupax Del Norte, Nueva Vizcaya ang plano nga pagmina sa ila komunidad. Sadtong Agosto 4, ginhatagan sang Mines and Geosciences Bureau ang Woggle Corporation, kumpaniya nga nakabase sa United Kingdom, sang exploration permit agud tun-an ang mineral nga makuha sa banwa, Plano nga sakupon sang kumpaniya ang 3,102 ektarya nga kadutaan sang lima ka barangay ukon 10% sang pangkabug-osan nga kadutaan sang amo nga banwa.

Gilayon naman nga nagpaguwa sang resolusyon ang barangay Oyao batuk sa pagmina kag ang sangguniang bayan, nga nagamando sa kanselasyon sang nagakatabo nga mining exploration sa banwa. Nagpabutyag sang pagpakamalaut ang Diocese sang Bayombong. Naglunsar sang signature campaign ang mga residente.

Samtang, nagpanawagan ang komunidad sang Barangay Bulalacao, Mankayan, Benguet para kanselahon ang permit sang Crescent Mining Development Corporation (CMDC) para sa Mineral Production Sharing Agreement nga liwat ginhatag sa kumpaniya sa pihak sang kawad-on sini sang free, prior and informed consent halin sa mga tumandok kag certification of precondition, nga gintalana sang reaksyonaryong layi.

Yara sa 534 ka ektarya nga bahin sang duta sang mga katigulangan ang sakop sang proyekto kag ginhatag man sa kumpaniya ang dugang nga 300 ektarya sa amo nga lugar. Peligro ang operasyon sa masobra 600 ka pamilya nga nagasalig sa pagpananum sa kadutaan sang katigulangan. Ang CMDC ginapanag-iyahan sang Asean Copper, nga 40% nga ginapanag-iyahan sang isa ka kumpaniya nga Australian.