Iti napalabas a bulan, immadu dagiti nakaam-amak a kaso ti human trafficking dagiti Pilipino a naiserrek kadagiti “scam hub” iti Cambodia, Thailand, Laos ken Myanmar. Segun iti datos ti estado, saan a bumaba iti 695 a Pilipino ti biktima a nakalasat ita a tawen kadagiti nadakamat a pagilian.

Ti scam hub trafficking ket maysa a tipo iti trafficking wenno iligal a panagrekrut tapno manggundaway no sadino a dagiti biktima ket inallilaw iti awis a peke a trabaho ket inserrek kadagiti scam hub wenno scam farm kas online a scammer para kadagiti sindikato. Numan kasta, saan nga amin dagiti biktima ket na-traffick, amin dagiti agtrabtrabaho iti scam hub ket rinanggasan ken inabuso tapno piliten dagitoy nga aramiden ti iligal nga aktibidad.

Ti kadawyan nga ipapaaramid kadagiti biktima ket “romance scam” no sadino ket sulisugen da dagiti target a biktimaen, agingga nga awisen nga agpaw-it ti kuwarta para iti peke a negosyo, cryptocurrency ken dadduma pay a bogus a panagpuonan. Target dagiti operasyon da ket dagiti pagilian ti Asia, North at South America, at Middle East. Dagiti scam hub ket imatmatonan dagiti gangannaet a kriminal a sindikato, karaman dagiti lokal nga opisyal ti gobyerno.

Immuna a naireport ti kastoy a porma ti trafficking idi 2015. Ngem kimmaro daytoy ken nagbalin sistematiko idi 2021. Inaramat dagiti sindikato dagiti nabaybay-an a casino ken hotel tapno aramiden nga scam hub. Kaaduan dagiti scam hub ket nagrugi iti Southeast Asia ngem limmawa daytoy agingga iti West Africa, Middle East ken Central America. Target dagiti sindikato dagiti mangmangged nga addaan kaammoan iti information technology ken nalaing iti ingles a pagsasao.

Nagbalin met lang a pagrussuatan ti scam hub iti Pilipinas, nga nailimmeng iti Philippines Offshore Gaming Operation wenno POGO nga intakder iti pagilian. Kaaduan nga inadipen ket dagiti Chinese nga iligal nga inserrek iti pagilian ken dagiti Pilipino a pinagtrabaho kas scammer kadagitoy a pasilidad.

Ti makapasidduker a kapadasan dagiti biktima

Kaaduan kadagiti biktima a Pilipino ket naallukoy nga agtrabaho kas customer service representative iti Cambodia ken Myanmar nga agsueldo iti US$700 kada bulan. Ngem apagsangpet da idiay ket nakumpiska dagiti pasaporte ken selpon da. Inserrek da ida iti scam hub, a ti target da ket dagiti Pilipino iti US.

Adipen ken tagilako ti trato da kadagiti Pilipino nga imigrante. No saan da a maaramid dagiti trabaho ken saan a madanon ti kota, ranggasan da ida, ikulong nga awan ti makan ken pabpabainan dagiti amo da. Kakaruan a linak-am da ti tortyur ken pannaka kuryente. Dagiti dadduma a mangmangged ket ilaklako da iti sabali a kumpanya iti oras nga saanen a “pakairanudan” dagiti among da.

Numanpay nakalasat kadagiti scam hub, adu kadagiti biktima a Pilipino ti agtultuloy a makarikna iti troma ken problema iti salun-at gapu iti nakalkaldaang a kapadasan da.

Iti agdama, adda 148 migrante a Pilipino ti nakatuding nga isalbar ken iyawid iti Pilipinas manipud iti naduma-duma nga scam hub iti Asia.

Nupaykasta, agtultuloy a sikikidem a mangnamnama ken agpakpakaasi a matinnag iti palab-og dagiti Pilipino iti diaya a peke a trabaho iti sabali a pagilian gapu iti nakaro a krisis iti ekonomya ken kinakirang ti trabaho iti pagilian.

Iti nakaro, imbes a mangted ti pangmabayagan a trabaho nga addaan ti makabiag a sweldo, ti Department of Migrants Workers pay mismo ti agbalbalin a “trafficker” ti estado. Ilaklako daytoy ti nalaka a pigsa’t tegged dagiti Pilipino iti sabali a pagilian kasukat ti bilyon a dollar a remitans kabayatan a pagsisinaen dagiti pamilya ken naikkatan ti dignidad dagiti migrante. Kayat pay daytoy ita nga usaren dagiti lokal a gobyerno kas “rekruter” dagiti pagilian ken gangannaet a kumpanya, iti bangir dagiti saan a maibus nga istorya ti pananggundaway ken panangabuso a laklak-amen dagiti migrante a Pilipino.

Agingga a saan a marisut ti kinapanglaw ken masolbar ti programa ti panag-export ti trabahador nga agresulta kadagiti pwersado a migrasyon, sigurado nga umadu pay dagiti biktima a ranggasan ken abusoen dagiti sindikato, ken magundawayan iti desperasyon dagiti migrante, nga awan sabali a kalikagum no di maaddaan ti nasaysayaat a panagbiag dagiti pamilya da.