Naupay unay dagiti biktima ken dagiti abogado da ken dagiti sumupsuporta iti pannakaitantan ti pre-trial chamber iti International Criminal Court (ICC) ti naituding a kumpirmasyon ti kaso ni Rodrigo Duterte a krimen iti sangkataoan iti September 23. Pinaboran ti korte ti paduyakyak dagiti abogado a ni Duterte ket “awanan kabaelan” wenno saan a “makabael a sumango iti bista.” Segun ti prosekusyon ti ICC, dagiti mismo annak ni Duterte ti nangibaga a nasalun-at ti panunot ti ama da.

Manipud idi naipauneg iti kustodya ti ICC ni Duterte, aktibo nga agmanmaniobra dagiti abogado na tapno maitantan wenno madadael ti kaso agingga iti kamaudianan ket ibasura ti kaso a maibusor kenkuana. Nagsasaruno dagiti indatag da a petisyon tapno maliklikan ti kumpirmasyon ti kaso.

Nairut a supsupyaten dagiti biktima daytoy a palusot. Inpanawagan da nga ituloy ti panangusig ti kaso iti kabiitan a panawen.