Manindigan Network, binuangay. Nagtitipon dagiti lider-relihiyoso, tao iti simbaan, dagiti grupo iti karbengan-tao ken ken dadduma pay tapno mabuangay ti Manindigan Network, maysa a tignayan a manglaban kadagiti panaglabsing iti karbengan-tao ken internasyunal a makatao a paglintegan iti uneg ti rehimen ni Marcos, idi Setyembre 6 iti Shalom Center Manila. Idi Setyembre 12, binuangay met ti Manindigan Central Luzon, iti Saint Scholastica’s Academy iti San Fernando, Pampanga, ti umuna a panrehiyon a balangay daytoy.

Laban dagiti delivery rider idiay Cebu. Dinarup dagiti Maxim delivery rider ken kameng iti Piston Cebu ti LTO Central Visayas Office idi Setyembre 15 tapno ipannawagan ti panangirelis kadagiti lisensya da ken motorsiklo a kinumpiska dagiti awtoridad. Kinondenar da ti panangliplipit ken saan a nainkalintegan nga aksyon ti ahensya kadagiti rider ti Maxim.

Okupasyon dagiti Israeli ti Siargao, kinondenar. Nagprotesta ti 80 residente ti Siargao iti Sunset Bridge iti Catangnan idi Setyembre 14 tapno kondenaren ti mapaspasamak a henosidyo idiay Gaza, ti in-inut a panangsakop dagiti Israeli iti Isla ken ti plano a panangitakder ti Chabad House sadiay. Nangisayangkat met ti petisyon a panagpapirma laban ti panangitakder ti Chabad House ken iti agdama ket nakaurnongen ti 3,550 a pirma.

Korapsyon ti badyet para iti 2026, sinupiat. Nagprotesta idi Setyembre 10 iti sango ti senado dagiti nailian demokratiko nga organisasyon tapno kondenaren ti panangpapartak ti budget ti opisina ti Presidente idiay kongreso babaen ti “parliamentary courtesy.” Segun kadagiti grupo, napuan korapsyon ti badyet para iti 2026. Pinadakkel ti badyet para ti AFP, confidential and intelligence funds ken NTF-Elcac, kabayatan a kinissayan ti badyet para iti serbisyo ti salun-at ken dandani awan nainayon para iti badyet ti edukasyon.