Linagip ti rebolusyonaryo a pwersa idi Setyembre 11 ti umuna nga anibersaryo ti pannakamartir dagiti kakadua nga isuda Ariel Arbitrario (Ka Karl), Erin Sagsagat (Ka Jorly), ken Danielle Marie Pelagio (Ka Seed), ti naawagan a Peñablanca 3. Dagitoy a 3 ket pasig nga hors de combat a naames a pinapatay dagiti berdugo nga 502nd IB iti Barangay Baliuag, Peñablanca, Cagayan.

Kas lagip iti napnuan raniag a biag da, ken saan a magatadan a kinabannuar ken naibingay iti nailian-demokratiko a rebolusyon, nangisayangkat ti pammadayaw dagiti rebolusyonaryo a pwersa ti Cagayan Valley nga addaan tema, ” Pasilapen ti naimbalitukan a kinabannuar dagiti martir tayo! Agilinteg ken itultuloy ti dinaliasat da a dalan ti rebolusyon.”

Kangangatuan a saludo ti inpaay iti tallo ken linagip dagiti biag da ken pannakidangadang kas mannakigubat ti umili. Nangidaton kadagiti daniw ken kanta dagiti naduma-duma a grupo ken indibidwal iti pammadayaw. Sumagmamano kadagiti naipresenta ket dagiti daniw a Binhi ng Paglaya ni Amanda Echanis, Tagubilin at Habilin ni Jose Lacaba, ken Hukbo ng Maralita ni Kerima Tariman. Nakabukel met ti video tribute ti BHB-Cagayan Valley a kagiddan a naiyebkas ti daniw a Silang mga Walang Kamatayan ni Emil Magalat. Nagleppas ti programa iti panagkansyon ti Mangahas ken ti Awit ng Pag-asa. Pudno nga inspirasyon isuda a saan nga ordinario ken ti saan agpatengga a kinatan-ok!