Saan nga agressat ti dalluyon ti protesta iti intero a pagilian laban iti sistema ti korapsyon iti estado. Iparparangarang daytoy ti agluplupyas nga unget ti nalawa nga umili a Pilipino laban iti nalabes a burukrata-kapitalista a panagtakaw ti rehimen a Marcos.

Iti panaglagaw a kaluban ti bukod na manipud unget ti umili, inkapilitan nga agpaguapo ni Marcos tapno baliktaden ti nabayagen a reputasyon na kas daulo ti kinakunniber. Bayat nga ip-ipiten dagiti karibal a pulitiko ken kaalyado a saan nagisentra ti kikbak, pilpiliten ni Marcos a kaluban ti bukod na a papel iti nasaknap a korapsyon.

Binukel ni Marcos ti awan kaes-eskan na nga “independyente a komisyon” nga isu kano ti mang-imbistigar iti a proyekto a flood control. Taktika laeng daytoy nga imbestigasyon nga inmandar ni Marcos Jr tapno tikawen ti umili ken maiyadayo kenkuana ti atensyon.

Pudno a ni Marcos ti utek ti korapsyon iti likudan ti maanomalya a proyekto ti flood control, a ginaburan na ti nasurok ₱1 trilyon manipud idi nagtugaw iti poder idi 2022. Kapada met laeng dagiti sinaruno na, umak-akop ni Marcos ti binilyon a kuarta manipud kikbak iti multibilyon a kontrata ti gobyerno, pakairamanan dagiti kalsada, rangtay, riles, ken dadduma pay a dadakkel a proyekto iti konstruksyon, agraman payen ti ismagling, kontrata iti depensa, kontrata iti panagpaabang iti daga, ken adu pay a pamuspusan ti panagtakaw iti kuarta ti pagilian.

Agpapaimas iti biag ken aglaplapusanan iti kinabaknang ti daulo a burukrata-kapitalista a ni Marcos. Nalatak ti panaggusto na kadagiti eksklusibo a konsyerto nga agbalor ti multimilyon ken nagarbo a panagpapasken kas ti napasamak iti kasangay na iti laeng nabiit. Napalalo ti panangbatikos kenkuana ti panagbiyahe na iti Singapore tapno agbuya laeng ti kinnamatan dagiti kotse. Inusar da nga agassawa ti pondo ti pagilian tapno aramaten a personal a pagbakasyunan ti Malacañang, para iti kapritso ti pamilya da.

Puskol rupa nga ulbod ni Marcos ti pammarang a kakuyog na ti umili iti pananggura iti korapsyon, ken ti pangibaga a nu saan laeng a presidente ket karaman isuna kadagiti protesta. Ti kinapudno , tengngel ni Marcos ti manangidadanes a bileg ti pasista nga estado nga us-usaren na tapno pasardengen ti umili ken paritan ti amin a klase ti panaglaban ti umili.

Sibibiag ti patawid ti 14-tawen pasista a diktadura ken nangikisap ti pagbagasan ti pagilian ti ama na a ni Marcos Sr. Dagiti organisador ken miyembro dagiti unyon ti mangmangged, dagiti timpuyog iti komunidad, dagiti organisasyon ti estudyante karaman payen dagiti mangitandudo ti karbengan-tao ket masissiim, mariri ken target ti naranggas nga atake dagiti ahente ti estado. Ginasut pay dagiti balud-pulitikal ti nakapupok. Awan sarday dagiti panaglabsing ti karbengan-tao ken sangalubungan a makatao a linteg iti panangipataw ni Marcos ti militarista a paglintegan kadagiti rinib-ribu a baryo iti kaaw-awayan tapno lappedan ti panangidepensa ti umili kadagiti daga ken pangkabiagan laban iti iseserrek wenno panagpalawa dagiti plantasyon ken mina.

Ni Marcos, daulo ti burukrata-kapitalista nga estado, ti ari ti korapsyon. Isuna ti puon ti pasista nga addaan landok nga ima a mangparmek kadagiti amin a tumubngar ken lumaban. Isuna ti daulo nga “aso-aso ti US” ken babaunen nga agserserbi kadagiti estratehiko nga interes ti imperyalista nga US iti ekonomya, pinansya ken militar.

Biktima dagiti Pilipino ti nasaknap ken sistematiko a korapsyon ken pasismo. Agsagsagaba da iti bulok a serbisyo sosyal, panagngato ti magastos iti panagbiag, nababa ti sweldo, nasaknap ti kinaawan trabaho, awan pangkabiagan ken nakaro’t pangkabuklan a kasasaad ti sosyo-ekonomiko. Bumarbaringkuas ken agproprotesta da tapno idarum ni Marcos ken pagbayaden dagiti kunniber.

Kasapulan a patibkeren dagiti Pilipino ti panagkaykaysada, buangayen dagiti organisasyon da ken palawaen ken pakaruen dagiti panagprotestada kadagiti umay a bulan. Rumbeng laeng nga ibutaktak ken ilaksid ti sumagmamano a pwersa a sumaksakay iti protesta nga anti-korapsyon a mangsalaknib ken Marcos kasukat ti maganab ken posisyon. Agserserbi da kadagiti plano ni Marcos a pakalmaen ti protesta. Ngem napaay da gapu kadagiti ubbaw ken awan serbi na a panaginkukuna ni Marcos ket ad-adda pay a mangparubrob iti tignay protesta. Pumigpigsa ti pukkaw para iti panaglusulos wenno panangpatakyas kenni Marcos ken amin a kunniber iti estado.

Bayat a mapalpalawa dagiti protesta maikontra kenni Marcos ken iti nasaknap a korapsyon ket rumbeng nga ingato ken isilpo ti umili a Pilipino iti pangkabuklan a dangadang tapno magibusan ti manangikulbo a sistema a malakolonyal ken malapyudal. Daytoy a sistema ket nakapauneg iti daulo ti dadakkel a burgesya kumprador, dagiti d burukrata kapitalista, ken dadakkel nga apo’t daga.

Dagitoy a dasig iti Pilipinas ket pinataud ti imperyalismo nga US ken mangkonkontrol iti neokolonyal nga estado. Isuda amin ket sumungsungbat, paspasurot ken makikumkumplot iti imperyalismo a US iti panagtakaw iti kinabaknang ti pagilian ken iti pasista a panangranggas iti nalawa a masa ti pagilian. Iti partikular, usar dagiti burukrata kapitalista ti bileg ti estado tapno takawen ti kuwarta ti pagilian ken agpabaknang iti amin a klase ti korapsyon.

Iti maudi a kwenta, ti pannakidangadang kontra iti korapsyon ken amin a klase ti panangidadanes iti umili a Pilipino ket nakarkaro pay ngem panangikkat ken Marcos wenno iti panangpatakyas iti sibubukel a gobyerno. Mapagut laeng ti ramut ti sistematiko a korapsyon babaen ti demokratiko a rebolusyon ti umili tapno gibusan ti tallo a salot a burukrata-kapitalismo, imperyalismo ken pyudalismo. Iyab-abante daytoy ti Partido Komunista ti Pilipinas nga iggem ti Bagong Hukbong Bayan a kangrunaan nga armas tapnu rippuogen ti armado a pigsa ti reaksyunaryo ken neokolonyal nga estado.

Aw-awisen ti Partido ti umili a Pilipino nga ad adda pay a papigsaen dagiti rebolusyonaryo nga organisasyon, palawaen ti benneg ti National Democratic Front, ken suportaran ti, ken umanib iti, Bagong Hukbong Bayan.

Ipampanawagan ti Partido kadagiti agtutubo nga agturong iti nalawa a kaawawayan nu sadinnu nga agtultuloy nga panpandayen ti rebolusyonaryo a tignayan dagiti organo ti bileg pampulitika. Maipunpundar daytoy kadagiti basaran nga organisasyon masa ti mannalo, agrutubo, kababaihan ken dadduma pay a demokratiko a sektor, katinnulong ti hukbong bayan. Agserbi daytoy kas bin-i to demokratiko a gobyerno ti umili a mangsukat iti bulok ken papet a gobyerno iti kanito a magun-od ti rebolusyonaryo a balligi iti armado a dangadang para iti nailian a wayawaya ken hustisya a pangkagimongan.