Diri nahingangalimtan han mga residente han Marcia an pira kadekada na nga pagbulig han Partido ngan hukbo han katawhan ha ira komunidad. Ha maiha nga panahon, nagin kaupod nira an mga Pula nga mangaraway. Ha giya han Partido, napag-adman nira an Katilingban ngan Rebolusyon Pilipino, mga ispesyal nga kurso ngan iba pa nga nag-oorganisa ngan nagpapagios ha bug-os nga baryo. Gintagan solusyon an problema han ira kaapuy-apuyan kontra ha mga grupo nga parupanulis ha lugar nga butaray nga nanlupot han ira mga produkto ngan nagpatay ha ira mga kaurupdan ngan kabataan nga waray kapas umato. Nasirutan an mga lider hini nga grupo.

Ha ilarum han Ikaduha nga Dakila nga Kagiusan Pagtutul-id, nailansar nira an kontrapyudal nga pakigbisog kontra ha mga lokal nga agaron maytuna. Nagin madinaugon hira ha paghuman hini nga matiyupion nga mga pamaagi. Naidaug nira an diri paghahatag porsyento han ira ani. Ha bulig han mga kasama, nagin kahiaraan nira an pagpapatuman han simple nga kooperasyon ha buruhaton produksyon ngan iba pa ha baryo.

Sering nira, diri nira hadto makakab-ot an hustisya kun waray an Partido, hukbo han katawhan ngan bug-os nga rebolusyunaryo nga kagiusan.

Pagtutul-id ngan pagpasulong

Igindungan han taga-Marcia an pagtudlok han mga pagsasayop ngan kaluyahan ha ranggo han Partido, hukbo ngan organisasyon masa ha proseso han utro nga pagtutukod han tsapter han Pambansang Katipunan ng Magbubukid (PKM). Iginlansar nira an pagsuson ngan pagsuson-ha-kalugaringon. Ginsusnan nira an malangan nga pagtukod han PKM ngan an dagkot-parong nga estilo han buruhaton masa. Sering nira, waray tagan-atensyon an buruhaton ha pagpapahiluag han base panmasa. Pauru-utro an pag-aram han mga kurso ha PADEPA ngan iba pa nga diri naman haum ha presente nga ginkakaatubang nga problema ha baryo ngan base panmasa. An Partido, hukbo ngan bug-os nga rebolusyunaryo nga kagiusan dudrungan liwat nga nagsuson-ha-kalugaringon ha ira mga amot ha kabug-usan nga pag-atras ha nakataliwan nga mga tuig.

Ha katapusan nga parte han asembleya, iginlansar an eleksyon ha pagpili han tsirman ngan mga kagawad komo mga ikaduha nga tsirman ha magkalain-lain nga natad han buruhaton. Igin-eleher nira an hadto anay mga lider ha komite nga pan-organisa (OC) komo mga kagawad. “Katinan naton an iginhatag han taghimaryo nga responsabilidad,” saad han bag-o nga eleher nga komite.

Dayon nga iginplastar an usa katuig nga programa han PKM para ig-isa an balitang han organisasyon masa. Target nira nga tukuron an komite nga rebolusyunaryo ha baryo sakob han unom kabulan. Antes hini, susrunod nira nga tutukuron an hul-os nga asosasyon masa han kabatan-unan, kababayin-an ngan mga pankultura nga trabahador. Papapelan liwat nira an buruhaton rekoberi ngan pagpapahiluag han base panmasa para mayda hiluag nga magigiusan an mga kaapihan ngan magserbe nga maniobrahan han Bagong Hukbong Bayan samtang gin-uungbawan hini an “pagpahaligot-ha-kalugaringon ngan sobra nga konsentrasyon.”

Target liwat han asosasyon nga dudrungan nga konsolidahon an tanan nga pwersa pinaagi han buruhaton edukasyon ngan propaganda. Gintagan-duon hini an pag-aram ha Padepa, Rebolusyon, kurso ha gerra han katawhan ngan iba pa. Karuyag liwat hini pakusgon an yunit milisya ngan iba pa nga yunit gerilya nga reserba nga kusog han BHB. Santop nira an importansya hini komo dugang nga armado nga pwersa ha pagsirot ha mga traydor ngan pasista nga kaaway, ngan ha pagkumpiska ha ira mga armas ngan iba pa nga panmilitar nga lohistika tikang ha magdinaugon nga taktikal nga opensiba.

Hingyap nira nga kumpletuhon an buruhaton ha pankatilingban nga imbestigasyon (SI) ngan sumpayan an madinaugon nga kagiusan nga kontrapyudal ha naglabay kontra ha matiyupion nga agaron maytuna ngan sinaliwan nga bag-o nga tipo nga agaron maytuna ha ira lugar.

Sigon kan Ka Jetro, usa ha mga lider masa nga tinambong, “an madinaugon nga pagtukod naton yana han PKM ha baryo an pamatuod han kamatuoran nga madig-on nga nakatindog an rebolusyunaryo nga kagiusan ha kabaryuhan.” Samtang gintatanum naton an liso han organo han pampulitika nga poder ha aton prente gerilya yana, piho nga ginhihimo liwat ini han mga kasama ha iba pa nga prente gerilya ha bug-os nga kamurupud-an, sering niya.

Ha pag-uli han mga nag-atender, bitbit nira an ira bag-o nga mga responsabilidad ngan naglalarab nga hingyap nga kab-uton an nasyunal nga katalwasan ngan tinuod nga demokrasya.

(Basahon an syahan nga parte, Tsapter han PKM, naitukod ha butnga han operasyon militar ha Negros, Ang Bayan, Septyembre 7, 2025)