Nagprotesta ha atubangan han US Embassy ha Pasay City an magkalain-lain nga grupo ha pangunguna han Bagong Alyansang Makabayan (Bayan) hadton Septyembre 16 agud kundenahon an natikagrabe nga presensya yana han mga tropa nga Amerikano, mga armas nga pan-gerra, war games ngan base militar han US ha teritoryo han Pilipinas. Paghandum liwat an protesta ha ika-34 nga anibersaryo han makasaysayan nga pagpapalayas han mga base militar han US ha Pilipinas.

Hadton Septyembre 16, 1991, masobra 170,000 nga patriyotiko nga mga Pilipino an nagtirok ha atubangan han Senado, agud ipanawagan an pagpabasura ha pagpapahilawig han RP-US Military Bases Agreement. Sigon ha Bayan, naatubang yana an nasud ha makababaraka nga pagbaliskad hiton nga kadaugan. Ha sinunod nga mga tuig ngan rehimen, ginbug-os an magkalain-lain nga kasarabutan ngan ligal nga basaranan han utro nga pagsulod han tropa militar han US ha Pilipinas. Kalakip hini an Visiting Forces Agreement ngan Enhanced Defense Cooperation Agreement nga nagin dalan para ha pagbalik han mga base militar han US ha nasud.