Padayon an pagrabunos han mga protesta ha bug-os nga nasud kontra ha sistema han korapsyon han estado. Gin-eespiho hini an nagsasalwak nga kangalas han hiluag nga masa han katawhan Pilipino kontra ha ura-ura kadako nga burukrata-kapitalista nga pandambong han rehimen Marcos.

Ha desperasyon nga panalipdan an kalugaringon ha kangalas han katawhan, pirit nga nagpapahamot hi Marcos agud baliskaron an maiha na niya nga reputasyon nga pasimuno han korapsyon. Samtang gin-gigipit an pira nga pulitiko nga karibal ngan bisan mga alyado nga diri nagsesentro han kikbak, pirit nga gintatahuban ni Marcos an kalugaringon nga papel ha hiluag nga korapsyon.

Ginbug-os ni Marcos an usa nga waray pulos nga “independyente nga komisyon” nga kunuhay mag-iimbestiga ha maanomaliya nga mga proyekto nga flood control. Taktika la ini nga imbestigasyon nga iginmando ni Marcos Jr agud lipungon an katawhan ngan igpahirayo ha iya an atensyon.

Tinuod nga hi Marcos an utok han korapsyon ha likod han mga maanomaliya nga proyekto ha flood control, nga ginbuhusan niya han masobra ₱1 katrilyon tikang han liningkod ha poder hadton 2022. Sugad han ngatanan nga iya ginsundan, hi Marcos naghahakin han bilyun-bilyon kapiso tikang ha kikbak ha multibilyon nga mga kontrata han gubyerno, kalakip an mga kalsada, tulay, riles, ngan iba pa nga dagko nga proyekto ha konstruksyon, hasta na liwat ha ismagling, kontrata ha depensa, kontrata ha pagpapaplete han tuna, ngan damo kaupay nga pamaagi han pangawat ha kwarta han katawhan.

Nagpapakahayahay ngan napatakas ha kahuralwaan an pinuno nga burukrata-kapitalista nga hi Marcos. Lanong an hangyo niya nga multimilyon kapiso nga eksklusibo nga mga konsyerto ngan garboso nga panga-on sugad han ginhimo ha iya kaadlawan diri pala maiha. Grabe hiya nga ginsukna ha paglupad ngadto ha Singapore para la magkita han karera han mga kotse. Gin-gamit niya ngan han iya asawa an pondo han katawhan agud himuon nga personal nga bakasyunan an Malacañang, para ha kapritso han ira pamilya.

Butaray nga nagbinuwa hi Marcos han nagpostura nga kausa ha katawhan ha kangalas ha korapsyon, ngan han mag-sering nga kun diri hiya presidente maupod liwat hiya ha mga protesta. An tinuod, katin ni Marcos an mapanmuypoy nga poder han pasista nga estado nga gin-gagamit niya agud pamingawon an katawhan ngan puypuyon an ngatanan nga porma han pag-ato han katawhan.

Buhi an sulundanon han 14-katuig nga pasista nga diktadura ngan pagpuyas ha pondo han katawhan han iya amay nga hi Marcos Sr. An mga organisador ngan kaapi han mga unyon han trabahador, mga asosasyon ha komunidad, mga organisasyon han estudyante, hasta na liwat an mga tag-undong han tawhanon nga katungod ginsasarbeylans, ginriringgal ngan target han madarahug nga pag-atake han mga ahente han estado. Gatus-gatos pa gihapon nga priso pulitikal an nakapriso. Waray wantas an mga pagtalapas ha tawhanon nga katungod ngan internasyunal nga makatawo nga balaud ha pag-imponer ni Marcos han balaud militar ha yukut-yukot nga barangay ha kabaryuhan agud puypuyon an pagdepensa han katawhan ha ira tuna ngan pakabuhi kontra ha pagsulod o pagpapahiluag han mga plantasyon ngan operasyon nga mina.

Hi Marcos, pinuno han burukrata-kapitalista nga estado, an hadi han korapsyon. Hiya an pinuno nga pasista nga may puthaw nga kamot agud rumkon an ngatanan nga natipa ngan naato. Hiya an pinuno nga “Tuta han Kano” ngan suruguon nga nagseserbe ha estratehiko nga mga interes han imperyalista nga US ha ekonomiya, pinansya, ngan militar.

Biktima an mga Pilipino han hiluag ngan unob ha sistema nga korapsyon ngan pasismo. Nag-aantos hira ha nadudunot nga serbisyo pankatilingban, paghitaas han gastos ha panginabuhi, himubo nga suhol, samwak nga kawaray hin trabaho, kawaray hin pakabuhi, ngan pankabug-usan nga paggrabe han sosyo-ekonomiko nga kamutangan. Nabuhat ngan nagpoprotesta hira agud kasuhan hi Marcos ngan papagbatunon an mga korap.

Kinahanglan padig-unon han mga Pilipino an ira pagkaurusa, tukuron an ira mga organisasyon, ngan pahiluagon ngan papintason an ira mga protesta ha tiarabot nga mga bulan. Kinahanglan nira ibuksas ngan igsalikway an pira nga pwersa nga nasingabot ha protesta nga kontra-korapsyon nga nagdedepensa kan Marcos kabalyo han benepisyo ngan pusisyon. Nagseserbe hira ha mga larang ni Marcos nga pakalmahon an protesta. Kundi pakyas hira tungod kay an mga buaw ngan waray pulos nga pamostura ni Marcos dugang la nga nagsusungo ha kagiusan protesta. Nagkukusog an guliat para ha pagbubul-iw o pagpapatalsik kan Marcos ngan ngatanan nga korap ha estado.

Samtang ginpapahiluag, an mga protesta kontra kan Marcos ngan ha hiluag nga korapsyon kinahanglan isahon ngan isumpay han katawhan Pilipino ha pankabug-usan nga pakigbisog agud tapuson an matalumpiguson ngan matiyupion nga sistema nga bagakolonyal ngan bagapyudal. Ini nga sistema aada ha ilarum han makaklase nga pamumuno han dagko nga kumprador burgesya, mga burukrata kapitalista, ngan dagko nga agaron maytuna.

Ini nga mga klase ha Pilipinas igin-anak han imperyalismo nga US ngan nagkokontrol ha neokolonyal nga estado. Ngatanan hira may baratunon, niyutiyo ngan nakikigkonsabuhay ha imperyalismo nga US ha pagdambong ha karikuhan han nasud ngan ha pasista nga panmuypoy ha hiluag nga masa han katawhan. Ha partikular, gamit han mga burukrata kapitalista an poder han estado agud kawaton an kwarta han katawhan ngan magpariko ha ngatanan nga porma han korapsyon.

Ha katapusan, an pakigbisog kontra ha korapsyon ngan ngatanan nga porma han pananalumpigos ha katawhan Pilipino labaw pa ha pagtatanggal kan Marcos o bisan ha pagpapatalsik ha bug-os nga gubyerno. Magagabot la an gamot han sistemiko nga korapsyon pinaagi han demokratiko nga rebolusyon han katawhan para tapuson an tulo nga demonyo nga burukrata kapitalismo, imperyalismo ngan pyudalismo. Iginpapasulong ini han Partido Komunista ng Pilipinas nga katin an Bagong Hukbong Bayan komo prinsipal nga hinganiban agud rub-on an armado nga kusog han reaksyunaryo ngan neokolonyal nga estado.

Gin-aaghat han Partido an katawhan Pilipino nga mas pakusgon an ira mga rebolusyunaryo nga organisasyon, pahiluagon an ranggo han National Democratic Front, ngan suportahan an, ngan umapi ha, Bagong Hukbong Bayan.

Nananawagan an Partido ha kabatan-unan nga kumadto ha hiluag nga kabaryuhan diin padayon nga ginpapauswag han rebolusyunaryo nga kagiusan an mga organo han pampulitika nga poder. Iginpupundar ini ha balayan han mga rebolusyunaryo nga organisasyon masa han parag-uma, kabatan-unan, kababayin-an ngan iba pa nga demokratiko nga sektor, kabakyang an hukbo han katawhan. Nagseserbe ini nga liso han demokratiko nga gubyerno han katawhan nga masaliwan ha dunot ngan niyutiyo nga gubyerno ha takna nga makab-ot an rebolusyunaryo nga kadaugan ha armado nga pakig-away para ha nasyunal nga katalwasan ngan pankatilingban nga hustisya.