Manindigan Network, igintukod. Nagduruyog an mga lider relihiyoso, tawo ha singbahan, mga grupo ha tawhanon nga katungod ngan internasyunal nga makatawo nga balaud ha ilarum han rehimen Marcos, hadton Septyembre 6 ha Shalom Center ha Manila. Hadton Septyembre 12, igintukod liwat an Manindigan-Central Luzon, ha Saint Scholastica’s Academy ha San Fernando, Pampanga, an syahan hini nga panrehiyon nga tsapter.

Pakigbisog han mga delivery rider ha Cebu. Kinadto an mga Maxim delivery rider ngan membro han Piston Cebu ha LTO Central Visayas Office hadton Septyembre 15 agud ipanawagan an pagpapabalik han mga lisensya ngan iskoter nira nga ginkumpiska han mga otoridad. Ginkundenar nira an pan-gigipit ngan diri makatadungan nga aksyon han mga ahensya ha mga rider han Maxim.

Okupasyon han mga Israeli ha Siargao, ginkundenar. Naglansar han protesta an aada ha 80 nga residente han Siargao ha Sunset Bridge ha Catangnan hadton Septyembre 14 agud kundenaron an nahitatabo nga henosidyo ha Gaza, an hinay-hinay nga pagsakop han mga Israeli ha ira isla ngan an plano nga pagtitindog dinhi han Chabad House. Naglansar liwat han petition signing kontra ha pagtitindog han Chabad House ngan yana nakagtirok na hin 3,550 nga pirma.

Korapsyon ha badyet para ha 2026, gintipahan. Nagprotesta hadton Septyembre 10 ha atubangan han Senado an mga nasyunal-demokratiko nga organisasyon, agud kundenaron an paspas nga pagpasa ha badyet han Office of the President ha kongreso gamit an tahub nga “parliamentary courtesy”. Sigon ha mga grupo, putos han korapsyon an badyet para ha 2026. Ginpahitaas an badyet para ha modernisasyon han AFP, confidential and intelligence funds ngan NTF-Elcac, samtang gin-ibanan an badyet para ha serbisyo ha kalibsugan ngan haros waray paghitaas para ha badyet ha edukasyon.