Hadin naglabay nga mga bulan, nabutad an makarimadima nga mga kaso han human trafficking han mga Pilipino nga ginsulod ha mga “scam hub” ha nasud Cambodia, Thailand, Laos ngan Myanmar. Sigon ha datos han estado, diri mamenos ha 695 nga Pilipino an biktima nga nakatalwas yana nga tuig ha nasering nga mga nasud.

An scam hub trafficking usa nga tipo han trafficking o iligal nga rekrutment para ha paniniyupi, kun diin an mga biktima nga gin-uuwat han saad nga peke nga trabaho iginsulod ha mga scam hub o scam farm komo online scammer para ha mga sindikato. Bisan kun diri tanan han biktima na-traffick, tanan nga trabahador ha scam hub gin-gagamitan han kamadarahug ngan pangangabuso agud pwersahon hira nga himuon an iligal nga aktibidad.

An kaagsuban nga ginpapatrabaho ha mga biktima an “romance scam” kun diin ginpapahigugma nira an mga target nga biktima, nga ha dayuday gin-eengganyar nga magpadara han kwarta ha peke nga negosyo, cryptocurrency ngan iba pa nga peke nga pamumuhunan. Target han ira operasyon an mga tawo ha nasud han Asia, North ngan South America, ngan Middle East. Ang mga scam hub gindudumara han mga langyaw nga sindikato nga kriminal, kakunsabo an mga lokal nga upisyal han gubyerno.

Syahan nga nahireport an sugad nga porma han trafficking hadton 2015. Kundi nagtikang ini nga magin hiluagan ngan sistematiko hadton 2021. Gin-gamit han mga sindikato an mga abandonado nga kasino ngan hotel para himuon nga scam hub. Kadam-an han mga scam hub nagtikang ha Southeast Asia kundi naghiluag ini tubtub ha West Africa, Middle East ngan Central America. Target han mga sindikato an mga trabahador nga may kahibaruan ha information technology ngan makarit ha lenggwahe nga English.

Nagin lansaran liwat han scam hub an Pilipinas, nga nagtago ha likod han Philippine Offshore and Gaming Operation o POGO nga igintindog ha nasud. Damo ha mga gin-uripon dinhi mga Chinese nga iligal nga iginsakob ha nasud ngan mga Pilipino nga ginpatrabaho komo scammer hini nga pasilidad.

An makangingirhat nga eksperyensya han mga biktima

Kadam-an ha mga Pilipino nga biktima naaghat nga magtrabaho komo customer service representative ha Cambodia ngan Myanmar nga may sweldo nga US$700 kada bulan. Kundi pag-abot nira didto ginkumpiska an ira mga pasaporte ngan selpon. Iginsulod hira ha scam hub, nga an target mga Pilipino ha US.

Uripon ngan epektos an pagtagad ha mga Pilipino nga migrante. Kun diri nira himuon an ira trabaho o naabot an kota, ginpapasul-an hira, iginpipriso hin waray pagkaon ngan ginpapakaaluhan han ira mga amo. Pinakagrabe nira nga nahiaguman an tortyur ngan pangunguryente. An iba nga trabahador iginbabaligya ha iba nga kompaniya ha takna nga diri na hira “mapahimulsan” han ira amo.

Bisan kun nakatalwas ha mga scam hub, damo ha mga biktima nga Pilipino an padayon nga nahihiagum han grabe nga troma ngan problema ha kalibsugan tungod ha makangingirhat nga eksperyensya.

Ha presente, mayda 148 nga Pilipino nga migrante an nakatalaan nga ireskyu ngan ibalik ha Pilipinas tikang ha magkalain-lain nga scam hub ha Asia.

Ha luyo hini, padayon nga nakapiyong nga nalaum ngan nahuhulog ha lit-ag an mga Pilipino ha saad nga peke nga trabaho ha iba nga nasud durot han grabe nga krisis ha ekonomiya ngan kawarayan han trabaho ha nasud.

Mas grabe pa, imbes nga maghatag han panmaihaan nga trabaho nga may makaburuhi nga suhol, an Department of Migrant Workers pa mismo an naakto nga “trafficker” han estado. Igintatanyag hini an barato nga kusog pagtrabaho han mga Pilipino ha iba nga nasud kabalyo han bilyon kadolyar nga remitans samtang ginbuburublag an mga pamilya ngan gintatanggalan han dignidad an mga migrante. Karuyag pa hini yana gamiton an mga lokal nga gubyerno komo “rekruter” han mga nasud ngan langyaw nga kompaniya, ha luyo han diri mahubas nga estorya han pananalumpigos ngan abuso nga nahiaaguman han mga migrante nga Pilipino.

Tubtub nga diri nareresolba an kakurian ngan nahibabasura an labor export program nga nagreresulta ha mga pwersahay nga migrasyon, segurado nga magdadamo pa an mga biktima nga dadarahugon ngan aabusuhon han mga sindikato, ngan mananalumpigos ha pagturaw han mga migrante, nga waray iba nga ruyag kundi matagan han mas maupay nga kinabuhi an ira pamilya.