Wala untat ang pagsabwag sang kalakasan sang rehimen Marcos kag armado nga pwersa sini batuk sa pumuluyo sa nagligad nga mga semana. Nalista ang duha ka kaso sang pagpatay, pagpangtiro kag pagpang-ipit sa mga lider-masa sa Visayas.

Sadtong Oktobre 5 sang gab-i, ginpatay sang gin-isa nga pwersang militar kag pulis si Roberto Cabales kag mangunguma nga si Matteo Suarez sa Barangay Coto, Lambunao, Iloilo. Ginpaguwa sang pulis kag militar nga nagbato ang duha samtang ginaserbe ang mandamyento de aresto. Ginpanginwala sang rebolusyonaryong kahublagan sa Panay ang pasibangod nga ini kag ginsiling nga indi armado ang duha.

Sa Samar, ginpatay sang 43rd IB kag sang paramilitar nga Dos ang mangunguma nga si Veronico “Tatay Birong” Anterio, 65, sadtong Septyembre 16 sa Barangay Carolina, Matuguinao. Ginpuntirya siya tungod nagserbe siya nga boses sang pakig-away sa paghari militar sang 43rd IB kag sang grupong paramilitar nga Dos sa ila komunidad. Maisog nga nag-atubang si Anterio sa mga pasista agud batikuson ang pang-ipit nga tikang nga ginpatuman sa Barangay Carolina nga ginakampuhan sang 43rd IB.

Pagpaniro. Patarasak nga ginpangtiro sang mga gwardya kag pribado nga armadong pwersa ang mga mamumugon sa kampo sa Hacienda Escolastica, Barangay Mabini, Cadiz City, Negros Occidental sadtong Septyembre 30. Pito ka mangunguma ang napilasan sa insidente. Ginpangguba kag ginkawat man sang mga gwardya ang mga tanum nga mais sang mga mangunguma. Gina-ipit sila tungod sa ila pakig-away para sa kinamatarung sa duta sa asyenda.

Pagpang-ipit. Ginpasakaan sang mga pulis sang reklamo nga paglapas sa Batas Pambansa 880 ukon ang Public Assembly Act ang mga lider-masa sang Cebu nga sanday Nanay Bebe Allere sang Panaghupong-Kadamay, Jaime Paglinawan sang Bagong Alyansang Makabayan-Central Visayas, John Ruiz sang Bayan Muna, Howell Villacrucis sang AMA-SUGBO-KMU, kag iban pa sadtong Septyembre 29. Ang reklamo kaangot sa kontra korapsyon nga protesta sa Cebu City District Engineering Office sang Department of Public Works and Highways Region VII sadtong Septyembre 5.

Samtang, nag-agum man sang pagpang-ipit kag Red-tagging halin sa 503rd IBde si Beatrice “Betty” Belen sadtong Septyembre 28-29 sang kadtuan siya sini sa Barangay Uma Del Norte, Lubuagan, Kalinga. Nagatindog siya nga tsirman subong sang Innabuyog-Kalinga kag anay bilanggong pulitikal.