Duha ka myembro sa Komite Sentral sa Communist Party of India (Maoist) ang kapin 10 ka adlaw nga sikretong gidetine ayha tinuyong gipatay sa armadong pwersa sa rehimeng Modi niadtong Setyembre 22. Gipagawas sa rehimeng Modi nga napatay sa engkwentro ang duha sa Abujhmad aron tabunan ang krimen ug likayan ang tulubagon dinhi.

Matud sa mga taho, nadakpan sa armadong pwersa sa India silang Kaubang Katta Ramachandra Reddy (Raju Dada) ug Kaubang Kadari Satyanarayana Reddy (Kosa Dada), parehong dili armado, sa Raipur City sa estado sa Chhattisgarh niadtong Setyembre 10. Gidudahang gidala sila sa usa ka sikretong lugar gikan Setyembre 11 hangtud Setyembre 20 kung asa posible silang gipailalum sa grabeng torytur ayha gipatay. “Bakak ang engkwentro. Angayan kining kundenahon sa tanan,” matud ni Vikalp, representante sa Dandakaranya Special Zonal Committee.

Gawas sa duha, nataho usab ang tinuyong pagpatay sa lima pa ka mga lider ug myembro sa Komite Sentral ug Eastern Regional Bureau sa CPI (Maoist) sa milabayng bulan. Silang tanan gipagawas usab nga mga napatay sa mga engkwentro. Giparangalan sa partido ang tanang mga martir ug nagbuhis og kinabuhi atubangan sa bangis nga Operation Kagar sa rehimeng Modi.