Gindagdagan sang rebolusyonaryong kahublagan sang silot si Garde Francisco, aset paniktik sang 15th IB kag may sampaw-sampaw nga kaso kriminal batuk sa rebolusyonaryong kahublagan kag mga sibilyan.

Napatay siya sa pagsalakay sang Bagong Hukbong Bayan (BHB)-Southwest Negros (Armando Sumayang Jr) sa iya balay sa Sityo Lumbia, Barangay Kamansi, Kabankalan City, Negros Occidental sadtong Oktubre 3 sang gab-i.

Imbolbado si Fransisco sa tatlo ka mga dalagko nga kaso sang pagpatay sa mga sibilyan, rebolusyonaryong lider kag Pulang hangaway sa isla sang Negros.

Isa sa iya mga kaso ang pagbulig sa militar sa pagpatay kay Ericson Acosta, konsultant pangkalinong sang National Democratic Front (NDF)-Negros, kag kaupod niya nga lider-mangunguma nga si Joseph Jimenez sa Barangay Kamansi sadtong Nobyembre 30, 2022.

Imbolbado man si Francisco sa pagmasaker sang mga armado nga tinawo sang estado sa indi armado nga opisyal sa hilikuton medikal sang BHB, kaupod ang isa ka 6-bulan nga nagabusong, kag isa ka sibilyan nga drayber sa Barangay Tabugon sadtong Septyembre 21, 2023. Imbolbado man si Francisco sa kaso sa pagkamartir sang Kabankalan 7 sa Barangay Tapi sadtong Abril 27.

Suno kay Ka Andrea Guerrero, tagpamaba sang BHB-Southwest Negros, ang armadong aksyon kabahin sa pag-agum sang hustisya sang mga biktima sang pag-atake sang estado kag magaserbe nga pahanumdom man sa mga may “utang nga dugo” sa rebolusyon. “Indi malipatan ang kasaysayan sang inyo mga krimen, kag ipakig-away sang BHB ang hustisya,” siling niya.

Sa Samar, una nga nakapalupok ang BHB-Western Samar (Arnulfo Ortiz Command) batuk sa naga-operasyon nga tropa sang 8th ID sa Sityo San Pedro, Barangay Poblacion 3, San Jose de Buan sadtong Septyembre 27 sang hapon. Isa ka soldado ang napatay kag madamo ang napilasan sa mga berdugo.

Sa Oriental Mindoro, ginpaslaw sang BHB-Mindoro (Lucio de Guzman Command) ang pag-atake sang tropa sang 203rd IBde kag 2nd CMO Battalion sa temporaryo nga kampo sini sa Sityo Badyang, Barangay San Roque, Bulalacao sadtong Oktubre 1. Organisado nga nakabalos palupok ang hukbo sang banwa nga nagpa-dis-organisa sa kaaway kabangdanan sang ila pag-atras.

Sadtong Septyembre 25, nakadepensa man ang BHB-Mindoro batuk sa naga-atake nga pwersa sang 203rd IBde sa Sityo Barayong, Barangay Manuol, Mansalay. Tatlo ka soldado sang 203rd IBde ang napatay sa inaway, samtang madamo pa nga iban ang napilasan.