Gintukod sini lang sang mga Negrosanon ang GMO-Free Negros Coalition, isa ka asosasyon sang 82 ka indibidwal kag organisasyon halin sa sektor sang mangunguma, non-governmental organization, tawong simbahan, estudyante, akademiko, tag-iya sang mga hotel kag restawran kag pribado nga sektor para pamatukan kag pakigbatuan ang hagna nga pagpasulod sang mga tanum nga GMO (genetically-modified organism) sa probinsya.

Ginagiit nila nga dapat sundon ang mga ordinansa nga nagadumili sa pagpasulod, pagtanum, pagpatubo, pagtesting kag distribusyon sang buhi nga GMO sa isla.

Sadtong 2023, nagpahayag sang interes ang San Miguel Corporation nga mangapital sa probinsya para sa pabrika sang patuka (feeds) kag proyektong manokan. Agud madayon ang proyekto, naghapag sang hagna nga ordinansa sadtong Agosto 26 ang lokal nga gobyerno agud mapasugtan ang pagtanum sang mga korporasyon sang GMO nga mais.

Sadtong Septyembre 30, naghatag sang apat ka position paper ang koalisyon sa sangguniang panglalawigan agud hangkaton ang hagna nga ordinansa. Naglunsar man sang hublag ang mga pamatan-on-estudyante halin sa lain-lain nga konseho, organisasyon kag publikasyon sadtong Septyembre 18 sa Bacolod City agud ipahayag ang ila pagpamatuk.

Nagpahayag man sang hugot nga pagpamatuk diri ang National Democratic Front-Negros. Siling sini, mas nga malumos ang mga mangunguma sa kaimolon kon pabayaan nga magsulod ang GMO sa probinsya tungod mapilitan sila nga magsalig sa mga imported nga binhi sang GMO kag mga input nga kontrolado sang dumuluong nga korporasyon. Peligroso man sa ikaayong lawas ang GMO tungod sa epekto sini sa lawas kasubong sang allergy, antibiotic resistance, cancer kag pangmalawigon nga pagkaguba sang internal organ sang tawo.