Sa ikatatlo nga higayon, ginpaiway sang Commission on Elections (Comelec) ang eleksyon parlyamentaryo sang Bangsamoro Autonomous Region in Muslim Mindanao (BARMM) nga natalana tani nga hiwaton sa Oktobre 13. Ini pagkatapos nga i-deklarar sang Korte Suprema nga lapas sa konstitusyon ang Bangsamoro Autonomous Act 77 (BAA 77 ukon Redistricting Bill), nga nagatalana nga isaylo ang pito ka pwesto sa parlyamento nga orihinal nga natalana para sa Sulu sa iban nga distrito sang BARMM.

Ginmanduan sang korte ang Bangsamoro Transition Authority nga maghimo sang bag-o nga tungaay sang mga distrito kag isumiter ini sa korte sa Oktobre 30. Ginsaylo man sini ang paghiwat sang eleksyon sa katapusan na sang Marso 2026. Nagakahulugan ini sang pagka-uyang sang ₱1.2 bilyon nga pondo nga nagamit na sang Comelec sa paghanda sa eleksyon.

Ginatan-aw sang pumuluyong Moro ang liwat nga pagpaiway bilang isa naman ka kapaslawan para ipatuman ang matuod nga otonomiya sa ila mga teritoryo. Antes pa ginpaguwa ang desisyon, ginpamatukan na nila ang pagpauntat sang Comelec sa paghanda tungod sa temporary restraining order sang Korte Suprema batuk sa BAA 77. Siling nila, indi lang bahin sa pagboto ang eleksyon. Mas importante, ini pagrespeto sa otonomiya, pagrespeto sa mga kasugtanan sa kalinong kag pagpalig-on sa kinamatarung para sa pagbuot sa kaugalingon sang pumuluyong Moro.