Ginpangayo sang 21 ka organisasyon sang mga abogado kag tigpangapin sang tawhanon nga kinamatarung sa International Criminal Court (ICC) sadtong Septyembre 29 nga dagdagan na sang aksyon pangdisiplina ang abogado ni Rodrigo Duterte nga si Nicolas Kaufman tungod sa sulit-sulit niya nga pagpangtorse kag pagpalapta sang sayup nga impormasyon angot sa kaso ni Duterte. Lakip sa mga grupo ang Karapatan, Duterte Panagutin Network kag Rise Up for Life and Rights.

Siling nila, ginatorse ni Kaufman ang aktwal nga mga panghitabo kag pahayag para matiplang ang korte. Isa diri ang ginpalapta niya nga nagpasugot ang prosekusyon, kag bisan ang gobyerno sang Pilipinas, sa petisyon para sa interim release ukon temporaryo nga kahilwayan ni Duterte. Ginpanginwala ini lunsay sang prosekusyon kag sang gobyerno sang Pilipinas.

Pila ka semana antes sini, ginsapubliko sang ICC ang tatlo ka importante nga dokumento nga nagasuporta sa kaso batuk kay Duterte: ang Document Containing the Charges (DCC), isa ka listahan sang 181 ka ebidensya, kag isa ka pre-confirmation brief, nga may petsa Hulyo 4.

Unod sang DCC ang tatlo ka counts ukon isip sang krimen batuk sa katawhan nga ihapag tani kay Duterte kon nadayon ang kumpirmasyon sang iya kaso sadtong Septyembre 23. Bisan kulang kag limitado ang ginpasaka nga kaso, ginakabig na sang mga biktima ang DCC bilang “importante nga tikang padulong sa pagpasabat.”