Sa maabot nga Oktobre 7, dumdumon sang kalibutan ang ikaduha nga tuig sang anibersaryo sang makasaysayan nga Al Aqsa Flood, ang armadong opensiba halin sa duta, dagat kag kahawaan sang mga pwersang Palestino, nga ginpamunuan sang Hamas kag sang Izz ad-Din al-Qassam Brigades, batuk sa manugsakop nga Israel.

Ginpalupok sang opensiba ang handum sang pumuluyong Palestino nga tapuson ang 75-tuig nga gyerang agresyon sang Israel. Suportado sang US ang okupasyon sa mga teritoryo sang Palestino, lakip ang nagapadayon nga pagpanakop sa Gaza, kag mga pag-atake sa mga komunidad sa West Bank.

Sa nagsunod nga duha ka tuig, wala-puas nga ginbomba sang Zionistang Israel, sa bulig sang imperyalismong US kag mga alyado nga pungsod sa Europa, ang sibilyan nga populasyon sang Gaza. Gindugmok sini ang mga ospital, simbahan, eskwelahan, apartment, bilding kag bisan mga evacuation center.

Naglab-ot sa masobra 66,500 Palestino ang ginpatay, 18,500 mga bata. Napatay man ang 453 tungod sa malnutrisyon kag gutom. Yara sa 254 nga mga mamalitha ang ginpatay. Sadtong Marso, lubos nga ginpunggan sang Israel ang pagsulod sang ayuda sa syudad, samtang gingamit sang soldado nga Israeli kag mga mersenaryong Amerikano ang pagpanagtag sini agud patyon ang mga Palestino. Sadtong Septyembre, bisan tuman ka ulihi, gindeklarar sang United Nations Commission of Inquiry ang ginahimo sang Israeli sa Gaza bilang henosidyo.

Hilwayon ang Palestine!

Saksi ang katawhan sa bug-os nga kalibutan sa kahustohon sang armadong paghimakas sang mga Palestino agud mahilway halin sa okupasyon kag henosidyo sang Zionistang Israel. Naghugpong ang mga pumuluyo para ipakita ang ila kaakig sa henosidyo, samtang ginaduso ang ila matag-gobyerno nga magtindog para sa mga Palestino. Linibo ka hublag nga may lain-lain nga dagway, sa lain-lain nga bahin sang kalibutan, kag ginpakigbahinan sang minilyon ka pumuluyo ang wala-puas nga ginlunsar. Nag-ululupod ang mga pungsod halin sa Africa, Asia kag Latin America agud maglunsar sang kampanyang ligal batuk sa okupasyon, para pasabton ini sa mga krimen sa gyera.

Sadtong Nobyembre 2024 nagpaguwa ang International Criminal Court sang mandamyento de aresto batuk kay Prime Minister Benjamin Netanyahu sang Israel kag kay Yoav Gallant, anay ministro sa depensa para sa kaso nga krimen sa gyera kag krimen batuk sa katawhan. Sa maabot nga Nobyembre, hiwaton ang International People’s Tribunal para sa Palestine sang International League of Peoples’ Struggle kag International Association of Democratic Lawyers agud isadokumento kag pamatbatan ang mga krimen sa gyera, henosidyo, ecocide kag lapnagon nga kagutuman sang Israel kag sang US batuk sa mga Palestino.

Sadtong Agosto, nagpalawod ang ginatawag nga Global Sumud Flotilla, nga ginabug-os sang 44 ka barko nga sakay ang masobra 400 ka tawo, agud magdul-ong sang serbisyo kag ayuda sa Gaza. Bisan nabalabagan sang Israel Defense Forces (IDF) ang mga barko sadtong Oktobre 2, nagpanindugan ang mga partisipante sini nga indi sila mag-untat sa pagdugmok sang pag-atake sang Israel sa Gaza.

Bisan ang mga pumuluyo sang Israel nagapakigbato kag nagapamatuk sa mga tikang sang kaugalingon nila nga gobyerno. Madamo sang mga pamatan-on nga Israeli ang ginapili nga magpapriso imbes nga magsulod sa IDF.

Sa Pilipinas, padayon nga nagahulag ang mga organisasyon agud maghatag sang suporta kag pakig-isa sa away sang mga Palestino, kaangay sang Youth for Palestine kag Palestine-Philippines Friendship Association. Naglunsar man sang kampanya agud punggan ang rehimen US-Marcos sa pagbakal sang armas sa Israel. Bisan sa iban nga pungsod, nangin kabahin ang mga Pilipinong migrante sa mga hublag para sa paghilway sang Palestine.

Sa subong, yara sa proseso sang negosasyon ang Hamas, ang Israel kag US, base sa ginhimo nga programa para sa hinun-anon pangkalinong para sa Gaza ni Donald Trump, presidente sang US, nga wala sang konsiderasyon sa mismo pumuluyo sini.

Sa pihak sa pagpangpapas nga gina-eksperyensiyahan sang mga Palestino, padayon pa gihapon ang ila pakigbato paagi sa armado kag indi armado nga paghimakas. Suno kay Leila Khaled, myembro sang Popular Front for the Liberation of Palestine, segurado nga maabot man ang kahilwayan sang mga Palestino tungod kaupod nila subong ang pumuluyo sa kalibutan nga padayon nga nagapakigbato tubtob matuod nila nga maangkon ang kahilwayan halin sa henosidyo kag okupasyon.