Tayuyon ang paglupok sang mga rali kag demonstrasyon sang mga demokratikong sahi kag sektor sa lain-lain nga bahin sang pungsod sa nagligad nga duha ka semana agud padayon nga kundenahon ang lapnagon nga korapsyon sang rehimen Marcos. Tungtungan nila ang rali sang ginatos ka libo nga Pilipino sa Luneta Park sa Manila kag sunod nga martsa sa Mendiola.

Sa dako nga protesta sadtong Septyembre 21, naglupok ang komprontasyon sa Mendiola kag kadalanan sang Recto. Nakuha sa mga bidyo ang brutal nga pag-atake sang mga pulis sa mga pamatan-on, paglampos sa ila sang batuta, pagsipa kag pabalabag nga pagbitbit. Nareport man ang pagpangluthang sang mga pulis kag paghaboy sang tirgas.

Wala nakugmat ang mga pamatan-on kag pumuluyo sa ginpakita nga ka-bagsik kag brutalidad sang armadong pwersa sang rehimen Marcos sang mapintas sini nga ginbungkag ang protesta kag komprontasyon. Indi magnubo sa 277 ka indibidwal, lakip ang 91 ka menor de edad (9 ka tuig ang pinakabata), ang ginbitbit sang mga pulis.

Napatay ang mamumugon sa konstruksyon nga si Eric Saber nga naigo sang bala sa liog sang nagpalupok nga pulis. Halin si Saber sa iya trabaho sa Pasay City, nagpanaog sa Recto Station kag nagatabok para masakay sa dyip sang luthangon siya halin sa likod. Nadala siya sa ospital apang napatay man sadtong Septyembre 23. Napatay man sa tunga-tunga sang komprontasyon ang 15- anyos nga si Mark Chustin Serbo, kaupod sa mga nagprotesta, nga ginbuno sang isa 52-anyos nga sibilyan.

Nag-agum sang kapintas sa kamot sang mga pulis ang mga gin-aresto kag ginpriso. Lakip sa ila mga bata kag pamatan-on, estudyante, mamumugon, mga empleyado sang BPO, kag pila ka gin-initan sang pulis tungod lang yara sa lugar sila sang bakbakan. Nagsugod lang nga hilwayon ang mga gin-aresto sadtong Septyembre 25 pagkatapos nga ginpadugay kag ginpaatrasar ang pagproseso sang mga pulis kag husgado sa ila kaso. Madamo kinahanglan magpyansa agud mahilway halin sa sampaw-sampaw nga mga kaso.

Ginhilway man ang mga menor-de-edad nga ginbitbit kag gin-aresto nga ginkabig nga imbolbado sa kagamo bisan wala sang maathag nga imbestigasyon. Ang pila sa ila ginpaatubang pa ni Manila Mayor Isko Moreno Domagoso sa publiko kag midya, lapas sa kinamatarung sang mga bata kag husto nga proseso sang layi.

Nagapanawagan ang grupo sa tawhanon nga kinamatarung sang bug-os kag independyente nga imbestigasyon agud pasabton ang tanan nga imbolbado sa kalakasan. Ginakundenar man nila ang “cover-up” sa mga krimen sang estado batuk sa pumuluyo.

Nagahulag ang pumuluyo

Padayon nga nagahorma ang kahublagan kontra korapsyon sa porma sang mga walkout, mga piket-protesta nga ginatawag nga Black Friday Protest, kag banwa-banwa nga paghulag sang mga sektor kag grupo. Linibo ang liwat nagpakita sang kapagsik sa Metro Manila, Isabela, Bulacan, Pampanga, Laguna, Palawan, Naga City, Davao City, Davao Oriental, kag iban pa nga syudad kag probinsya.

Sunod sa serye sang walkout sadtong una nga tatlo ka semana sang Septyembre, liwat nalista ang makasaysayan nga mga walkout sa Far Eastern University (1,000), University of Sto. Tomas (1,500), De La Salle University-Manila kag College of St. Benilde (1,500), Philippine Normal University (1,000), Isabela State University (500), DLSU-Laguna, UP Visayas (800), Ateneo de Davao University (1,000), Brokenshire College Inc. kag Davao Oriental State University. Singgit sang pamatan-on bisan sa mga konsyerto kag mga hinampang: “Bilangguon na, mga kurakot!”

Nag-walkout man ang ginatos ka manunudlo kag mamumugon sa edukasyon sadtong Oktobre 3 bilang pagbatikos sa korapsyon kag pagdumdom sang World Teachers’ Day.

Sa Bulacan, ginakabig nga sentro sang korapsyon sa mga proyektong flood control, nagahorma ang mga malapad nga paghiliugyon sang pumuluyo batuk sa korapsyon. Naghulag ang mga Bulakenyo sa 12 ka syudad kag banwa sa probinsya kag nagtindog batuk sa mga lokal kag pungsodnon nga ahensya sang gobyerno nga imbolbado sa korapsyon. Nagtukod sila sang mga grupo kag alyansa.

Ginalaragway sang nagasingki nga mga protesta ang madalum nga diskuntento sang mga Pilipino sa atubang sang krisis sa ekonomiya kag pulitika nga nagakastigo sa nagahari nga sistema. Manipestasyon ini sang lapnagon nga sentimyento sang malapad nga masa nga nagaantus sa korapsyon kag nagalala nga mga problema sang mala-kolonyal kag mala-pyudal nga sistema.